वीरगंज । पर्सास्थित वीरगंजको प्रतिष्ठाको प्रतीक मानिने घण्टाघरको भत्किएको संरचना सात महिनापछि मर्मतसम्भार गरिएको छ । गत फागुन ७ गते बाल्कोनी कमजोर भई इँटा झरेपछि घण्टाघरको संरचना आंशिक रूपमा क्षतिग्रस्त भएको थियो ।
वीरगंज महानगरले भत्किएको संरचना मर्मतसम्भार गरी रङरोगनसमेत गरेर घण्टाघरलाई पहिलाकै स्वरूपमा ल्याएको छ । महानगरको भूमि व्यवस्था तथा सहरी विकास महाशाखा प्रमुख प्रभात झाले ऐतिहासिक धरोहर भएकाले मेसिन प्रयोग नगरी म्यानुअल ढङ्गले मर्मतसम्भार गरिएको र यसले केही समय बढी लिएको जानकारी दिए । “हाल घण्टाघरको लगभग सम्पूर्ण संरचना निर्माण कार्य सम्पन्न भएको छ,” उनले भने ।
मर्मत अवधिमा घण्टाघर वरपर अत्यधिक सवारीसाधनको चाप हुने भएकाले यात्रु र सवारीको सुरक्षालाई ध्यानमा राख्दै कन्स्ट्रक्सन नेटले ढाकेर काम गरिएको उनले बताए । अहिले स्काफोल्डिङ र जाली हटाइसकेपछि घण्टाघर आकर्षक देखिएको छ । मर्मतपछि घण्टाघर कम्तीमा १० वर्ष टिकाउ हुने विश्वास गरिएको भए पनि भित्री संरचना भने क्रमशः पुरानो बन्दै गएको उनको भनाइ छ ।
घण्टाघर मर्मतसम्भार करिब २० लाखभन्दा कम लागतमा सम्पन्न हुने आकलन गरिएको छ । महाशक्ति कन्स्ट्रक्सनले ठेक्का पाएको सो कार्यको अन्तिम बिल भने अझै तयार नभएको महाशाखा प्रमुख झाले बताए ।
उनका अनुसार घण्टाघरको बाल्कोनीमा आकाशे पानीको उचित निकास नहुँदा घामपानीको असरले क्षति पुर्याएको थियो । “माथिल्लो बाल्कोनीमा पुगेर मर्मत गर्नुपर्ने भएकाले पनि समय बढी लाग्यो,” उनले थपे, “तर अहिले घण्टाघर पुरानै स्वरूपमा फर्किएको छ ।”
वीरगंजको घण्टाघर सन् १९७९ फेब्रुअरी ८ मा निर्माण भएको हो । स्थानीय ज्येष्ठ नागरिकका अनुसार जापानको योनागो सहरका विद्यार्थीहरूले एक दिनको खाजाको पैसा कटाएर सो घण्टाघर र घडी राख्न आवश्यक बजेटको व्यवस्था गरेका थिए । आजसम्म घण्टाघर वीरगंज आउने स्वदेशी तथा विदेशी पर्यटकको मुख्य आकर्षणका रूपमा रहँदै आएको छ ।
