वीरगंज । पर्सा जिल्लामा हैजा महामारी विरुद्ध प्रतिकार्य खोप अभियान अन्तर्गत आइतबारसम्म ८४ प्रतिशत लक्षित समूहलाई खोप खुवाइएको छ ।
स्वास्थ्य कार्यालय पर्साका जनस्वास्थ्य अधिकृत जयमोद ठाकुरका अनुसार, असोज २६ देखि कार्तिक २ गतेसम्म छ लाख ५२ हजार १२९ जनालाई लक्षित गरी खोप अभियान सञ्चालन गरिएको थियो। यसमा अहिलेसम्म पाँच लाख ४७ हजार ३११ जनालाई खोप खुवाइसकिएको जनाइएको छ।
जनस्वास्थ्य अधिकृत ठाकुरले भने, “अझै १६ प्रतिशत लक्षित समूह हैजा विरुद्धको औषधी खानबाट छुटेका छन् । उनीहरुलाई छठ पर्वपछि फेरि खुवाइनेछ। अहिलेसम्मको तथ्याङ्क हेर्दा अभियान प्रभावकारी ढङ्गले अघि बढिरहेको छ।”
स्थानीय तहअनुसार खोप वितरणको विवरण यस प्रकार छ:
-
वीरगंज महानगर : ८२%
-
ठोरी गाउँपालिका : ८६%
-
जिराभवानी गाउँपालिका : ७८%
-
जगरनाथपुर गाउँपालिका : ९४%
-
पर्टेवासुगौली गाउँपालिका : ८५%
-
सखुवा–प्रसौनी : ८९%
-
पर्सागढी नगरपालिका : ८४%
-
बहुदरमाई नगरपालिका : ८०%
-
पोखरिया नगरपालिका : ८३%
-
कालिकामाई गाउँपालिका : ८१%
-
धोविनी गाउँपालिका : ८५%
-
छिपरमाई गाउँपालिका : ९३%
-
पकहाँ–मैनपुर गाउँपालिका : ८०%
-
विन्दवासिनी गाउँपालिका : ९१%
प्रमुख जिल्ला अधिकारी तोयनारायण सुवेदीले अभियानमा सर्वसाधारणको सक्रिय सहभागिता रहेको बताउँदै भन्नुभयो, “हामीले खोप केन्द्रहरूको नियमित अनुगमन र निरीक्षण गर्दै आइरहेका छौँ । धान भित्र्याउने समय र चाडपर्वको कारण अभियानको समय थपेर पनि अघि बढाउन निर्देशन दिइएको छ।”
जनस्वास्थ्य अधिकृत ठाकुरले सबै एक वर्ष उमेरभन्दा माथिका व्यक्तिलाई खोप खुवाउन अनुरोध गर्दै भने, “मुखबाट खुवाइने खोप सुरक्षित र भरपर्दो भएकाले ढुक्क भएर सेवन गर्न सकिन्छ। गर्भवती र स्तनपान गराइरहेकी महिलालाई पनि खोप दिन सकिन्छ।”
यो अभियानमा एक पटक खोप दिइनेछ र एक वर्षभन्दा माथिका सबैले खोप लिनु अनिवार्य छ।
