यही चैत १९ गतेबाट शुरु हुने माध्यमिक शिक्षा परीक्षा (एसइई) का लागि मधेश प्रदेशमा आन्तरिक तयारी पूरा भएको छ । यस वर्ष प्रदेशभरबाट ८७,५९१ जना विद्यार्थी परीक्षामा सहभागी हुने भएका छन् ।
शिक्षा विकास निर्देशनालय मधेश प्रदेशका अनुसार प्रदेशभर २९९ वटा परीक्षा केन्द्र निर्धारण गरिएको छ । ती केन्द्रहरूमा १,३१६ विद्यालयका विद्यार्थी सहभागी हुनेछन् । परीक्षा सञ्चालन प्रभावकारी बनाउन जनशक्ति व्यवस्थापन पनि व्यापक रूपमा गरिएको छ ।
निर्देशनालयले जनाएको छ:
केन्द्राध्यक्ष: २९९
सहायक केन्द्राध्यक्ष: ४३३
निरीक्षक: ४,२३५
परीक्षा सहायक: ७३४
कार्यालय सहयोगी: १,६०३
सुरक्षाकर्मी: ४,४८५
जिल्लागत विवरणअनुसार, धनुषा जिल्लाबाट सबैभन्दा बढी १३,२६२ विद्यार्थी परीक्षामा सहभागी हुनेछन्, ती २०३ विद्यालयका विद्यार्थी हुन् । सबैभन्दा कम सप्तरी जिल्लाबाट ९,२७६ विद्यार्थी परीक्षामा सहभागी हुनेछन्, ती १६२ विद्यालयका हुन् ।
अन्य जिल्लामा सहभागी हुने परीक्षार्थी:
सिरहा: ११,०३८
महोत्तरी: ११,३५१
सर्लाही: ११,३७१
रौतहट: ९,७७७
बारा: १०,८१३
पर्सा: १०,७०३
अघिल्लो वर्ष ८८,८५८ विद्यार्थी सहभागी भएका थिए भने यस वर्ष १,२६७ जना कम सहभागी भएका छन् ।
शिक्षा विकास निर्देशनालय जनकपुरका निर्देशक महेन्द्र महतोका अनुसार परीक्षाको तयारी अन्तिम चरणमा पुगेको छ । परीक्षा मर्यादित, अनुशासित र निष्पक्ष बनाउन आठवटै जिल्लाका प्रमुख जिल्ला अधिकारीको संयोजकत्वमा जिल्ला परीक्षा समन्वय समिति मार्फत नियमित अनुगमन गरिनेछ ।
त्यस्तै मधेश प्रदेशको शिक्षा तथा संस्कृति मन्त्रालय, शिक्षा विकास निर्देशनालय, शिक्षा तालिम केन्द्र लगायतका निकायको समन्वयमा प्रदेशस्तरीय अनुगमन टोली गठन गरी परीक्षा व्यवस्थापन थप प्रभावकारी बनाइने तयारी गरिएको छ ।
सम्बन्धित निकायले परीक्षा उच्च सतर्कताका साथ सञ्चालन हुने र कुनै अनियमितता नहोस् भन्ने सुनिश्चित गर्न कडा निगरानी रहने जनाएको छ ।
