न्याय नपाउँदा बिचल्लीमा परिन् धनुषाकी बलात्कार पीडित महिला

प्रदेश

Home
प्रदेश
न्याय नपाउँदा बिचल्लीमा परिन् धनुषाकी बलात्कार पीडित महिला

न्याय नपाउँदा बिचल्लीमा परिन् धनुषाकी बलात्कार पीडित महिला

धनुषामा बलात्कार घटनाकी पीडित एक महिलाले पतिले समेत साथ छाडेपछि आफू बिचल्लीमा परेको बताउनुभएको छ ।

उहाँका अनुसार घटनापछि श्रीमान्ले साथ नदिई घरबाट निकालिदिँदा अहिले आफू थप पीडामा परेर माइतमा बस्न बाध्य हुनुभएको छ ।

धनुषाको सबैला नगरपालिका–३ की ती महिलाले गत पुस ६ गते आफू बलात्कारमा परेको भन्दै चैत १ गते जिल्ला प्रहरी कार्यालय धनुषामा जाहेरी दिनुभएको थियो। तर जाहेरी दर्ता भएको लामो समय बितिसक्दा पनि आरोपित पक्राउ नपरेको उहाँको गुनासो छ ।

पीडितका अनुसार २०८२ पुस ६ गते साँझ जनकपुरधाम–४, मुरली चोक क्षेत्रमा ‘प्रसाद’ भन्दै दिइएको लड्डु खाएपछि आफू बेहोस भएको र सोही अवस्थाको फाइदा उठाउँदै आरोपितले आफ्नो इच्छाविपरीत जबरजस्ती करणी गरेको उहाँले बताउनुभयो ।

जाहेरीमा सबैला नगरपालिका–३ का अमिस महरा आरोपित रहेको उल्लेख छ । आरोपितले घटनाको भिडियोसमेत बनाएको र सार्वजनिक गर्ने तथा परिवारलाई हानी पुर्‍याउने धम्की दिँदै पटक–पटक जबरजस्ती गरेको पनि जाहेरीमा उल्लेख गरिएको छ ।

पीडितका अनुसार आरोपित जनकपुरधामस्थित एक अस्पतालमा कार्यरत रहेको भए पनि खुलेआम हिँडडुल गरिरहेको र पक्राउ नपरेकोप्रति उहाँले असन्तुष्टि जनाउनुभएको छ ।

दोषीमाथि कारबाही नहुँदा र पारिवारिक साथसमेत गुमाउँदा आफू अत्यन्तै संकटमा परेको भन्दै उहाँले सम्बन्धित निकायसँग तत्काल न्याय र दोषीमाथि कारबाहीको माग गर्नुभएको छ ।