भारतको सीमावर्ती सहर रक्सौलमा अन्तर्राष्ट्रिय स्तरको विमानस्थल निर्माण प्रक्रिया तीव्र रूपमा अघि बढेको छ ।
परियोजना सम्पन्न भएपछि यो विमानस्थल पटना एयरपोर्टभन्दा पनि ठूलो हुने दाबी गरिएको छ । भारतीय सांसद डा. संजय जायसवालले शनिबार प्रस्तावित विमानस्थल क्षेत्रको स्थलगत निरीक्षण गर्दै परियोजनाबारे जानकारी दिएका हुन् । उनले विमानस्थललाई अत्याधुनिक संरचनासहित ठूलो हबका रूपमा विकास गरिने बताएका छन् ।
उनका अनुसार रनवे तिलावे नदी पारसम्म विस्तार गरिनेछ, जसले ठूला विमानहरूको अवतरण र उडानलाई सहज बनाउनेछ। परियोजनाका लागि करिब १३९ एकड जमिन आवश्यक पर्नेमा झण्डै ७० प्रतिशत जमिन अधिग्रहण भइसकेको छ ।
सांसद जायसवालका अनुसार कन्सल्टेन्ट छनोटका लागि टेन्डर आह्वान भइसकेको छ भने आगामी तीन महिनाभित्र विस्तृत डिजाइन तयार हुनेछ । निर्माण कार्य सम्पन्न गर्न १८ महिनाको समयसीमा तोकिएको छ ।
उनले विमानस्थल सञ्चालनमा आएपछि रक्सौल क्षेत्रको व्यापार, पर्यटन र रोजगारीमा उल्लेख्य वृद्धि हुने विश्वास व्यक्त गरे । साथै दिल्ली वा अन्य ठूला सहर जानका लागि पटना विमानस्थल धाउनुपर्ने बाध्यता अन्त्य हुने दाबी पनि गरे ।
परियोजना सन् २०१६ मा प्रधानमन्त्री प्याकेज अन्तर्गत अघि बढाइएको भए पनि विभिन्न प्रशासनिक कारणले ढिलाइ भएको थियो । सन् २०२३ पछि भूमि अधिग्रहण प्रक्रिया तीव्र बनेपछि काम पुनः अगाडि बढाइएको जनाइएको छ ।
स्थलगत निरीक्षण तथा पत्रकार सम्मेलनमा विभिन्न स्थानीय जनप्रतिनिधि तथा सरोकारवालाहरूको उपस्थिति रहेको थियो ।
