रक्सौल | भारत–नेपाल सीमा क्षेत्रअन्तर्गत रक्सौलस्थित मैत्री पुलबाट २ किलो ५६ ग्राम अफिमसहित एक भारतीय महिला पक्राउ परेकी छन् ।
भारतको सशस्त्र सीमा बल (एसएसबी) को ४७औँ बटालियनले नोभेम्बर २१ गते साँझ भारततर्फ प्रवेश गर्दै गरेकी महिलालाई लागुऔषधसहित पक्राउ गरेको हो । पक्राउ पर्नेमा भारतको पूर्वी चम्पारण जिल्ला गायघाट (उजैनलोहियार) निवासी संगीता देवी रहेकी छन् ।
एसएसबीका अनुसार शुक्रबार साँझ करिब ५ बजे पन्टोका समवायमा खटिएको इन्टेलिजेन्स (आईएनटी) र विशेष अभियान टोली (एसओजी) ले वीरगंजबाट मैत्री पुल हुँदै रक्सौलतर्फ एक महिलाले लागुऔषध ल्याउँदै गरेको गोप्य सूचना प्राप्त गरेको थियो ।
सूचनाका आधारमा समवाय कमान्डरले विशेष निगरानी तथा चेकजाँच टोली परिचालन गरी हरैया थाना प्रहरी र ड्युटी मजिस्ट्रेटलाई समेत जानकारी गराएका थिए ।
त्यसपछि एसएसबी र हरैया थाना प्रहरीको संयुक्त टोलीले सीमा स्तम्भ नम्बर ३९१/३३ नजिक चेकजाँच तथा निगरानी बढाएको थियो । सोही क्रममा राति करिब ८ बजेर ५ मिनेटमा वीरगञ्जबाट पैदल रक्सौलतर्फ जाँदै गरेकी एक महिलालाई शंकास्पद देखिएपछि रोकेर जाँच गरिएको थियो ।
महिला एसएसबी सुरक्षाकर्मीले उनको शरीर तथा सामान जाँच गर्दा शलभित्र सेतो झोलामा लुकाएर राखिएका दुईवटा प्याकेट फेला पारेका थिए । ड्रग डिटेक्सन किटमार्फत परीक्षण गर्दा उक्त पदार्थ अफिम भएको पुष्टि भएको र त्यसको कुल तौल २ किलो ५६ ग्राम रहेको एसएसबीले जनाएको छ ।
पक्राउ परेकी महिला र बरामद अफिमलाई थप कानुनी कारबाही तथा प्राथमिकी (एफआईआर) दर्ताका लागि हरैया थाना प्रहरीको जिम्मा लगाइएको छ ।
एसएसबीले भारत–नेपाल सीमा क्षेत्रमा लागुऔषध तस्करी नियन्त्रणका लागि निगरानी तथा सुरक्षा जाँचलाई तीव्र बनाइएको जनाएको छ ।