सर्लाही जिल्लाको पूर्वाधार विकास कार्यालय मलङ्गवाले बिचौलियालाई प्रदान गरिएको योजनाको चिठी फिर्ता लिएर सम्बन्धित वडा कार्यालयलाई उपलब्ध गराएको छ ।
‘पूर्वाधार विकास कार्यालयबाट योजना बिक्री भएको गुनासा’ शीर्षकमा वैशाख २७ गते प्रकाशित समाचारपछि कार्यालयले उक्त निर्णय गरेको हो । लालबन्दी नगरपालिका–१४ नारायणखोलामा सडक निर्माणका लागि आएको ७५ लाख रुपैयाँको योजनाको चिठी बिचौलियाले लगेको भन्दै वडाध्यक्ष छेनामसिंह घिसिङलगायत सेवाग्राहीले गुनासो गरेका थिए ।
वडाध्यक्ष घिसिङका अनुसार वैशाख २५ गते कार्यालय जाँदा योजनाको चिठी अरूले लगिसकेको जानकारी दिइएको थियो । तर समाचार सार्वजनिक भएपछि कार्यालयले उनलाई बोलाएर २५/२५ लाख रुपैयाँका तीनवटै योजनाको नयाँ चिठी उपलब्ध गराएको हो ।
घिसिङले वैशाख १५ गतेमै योजनाको चिठी काटिएको पाइएको दाबी गरेका छन् । उनका अनुसार चिठी बुझेका बिचौलियाले पटक–पटक फोन गरेर कमिसन मागे पनि आफूले अस्वीकार गरेका थिए । समाचार प्रकाशित भएपछि कार्यालय बाध्य भएर नयाँ चिठी दिन तयार भएको उनको भनाइ छ । हाल लालबन्दी–१३ र १४ को सीमा क्षेत्रमा पर्ने नारायणदोभानमा ट्रस पुल निर्माण भइरहेको छ । मधेश प्रदेश सरकारबाट प्राप्त ७५ लाख रुपैयाँबाट सडक निर्माण गरी मटर दोभानसम्म सडक ट्र्याक पुर्याउने लक्ष्य रहेको वडाध्यक्ष घिसिङले जानकारी दिएका छन् ।
उनका अनुसार योजनाको चिठी प्राप्त भएसँगै शुक्रबार गाउँभेला गरी उपभोक्ता समिति गठन गरेर काम अगाडि बढाइनेछ ।
पूर्वाधार विकास कार्यालय सर्लाहीका निमित्त कार्यालय प्रमुख तथा इन्जिनियर सञ्जयकुमार यादवले आफू गत शुक्रबार मात्रै कार्यालय प्रमुखको जिम्मेवारीमा आएको भन्दै यसअघि कसरी चिठी काटियो भन्ने जानकारी नभएको बताएका छन् । उनले पुराना चिठीको कार्बन कपी खोज्न समय लागेको दाबी गरेका छन् । इन्जिनियर यादवका अनुसार कार्यालयमा चार सयभन्दा बढी योजना रहेकाले सीमित कर्मचारीबाट काम गर्न कठिन भइरहेको छ ।
स्थानीयस्तरमा भने पूर्वाधार विकास कार्यालयबाट योजनाको चिठी खरिद–बिक्री हुने गरेको गुनासो पटक–पटक उठ्दै आएको छ ।
