परराष्ट्रमन्त्री शिशिर खनाल आजदेखि तीन दिने औपचारिक भ्रमणका लागि भारत प्रस्थान गर्दैछन् ।
परराष्ट्र मन्त्रालयले बिहीबार सार्वजनिक गरेको भ्रमण कार्यतालिकाअनुसार भारतीय विदेशमन्त्री एस. जयशङ्कर को निमन्त्रणामा परराष्ट्रमन्त्री खनाल २२ देखि २४ जेठसम्म भारत भ्रमणमा जान लागेका हुन् ।
भ्रमणका क्रममा परराष्ट्रमन्त्री खनालले भारतको राजधानी नयाँ दिल्लीमा आफ्ना भारतीय समकक्षी विदेशमन्त्री जयशङ्करसँग औपचारिक द्विपक्षीय भेटवार्ता गर्ने कार्यक्रम रहेको छ ।
परराष्ट्र मन्त्रालयका अनुसार उक्त भेटवार्तामा नेपाल–भारत सम्बन्धसँग सम्बन्धित पारस्परिक हितका विविध विषयमा केन्द्रित रहेर छलफल हुनेछ । विशेषगरी दुई देशबीचको व्यापार, लगानी, कनेक्टिभिटी (सम्पर्क सञ्जाल), ऊर्जा सहयोग तथा जनता–जनताबीचको सम्बन्धलाई थप सुदृढ र विस्तार गर्ने विषयमा विस्तृत विचार–विमर्श हुने कार्यसूची रहेको छ ।
यस्तै, नेपाल र भारतबीच नियमित रूपमा हुँदै आएको उच्चस्तरीय भ्रमण आदानप्रदानलाई निरन्तरता दिने तथा द्विपक्षीय सम्बन्धलाई थप प्रभावकारी बनाउने विषयमा पनि छलफल हुने बताइएको छ ।
परराष्ट्र मन्त्रालयले नियमित उच्चस्तरीय भ्रमणका रूपमा हुन लागेको यस भ्रमणले नेपाल र भारतबीचको कूटनीतिक, ऐतिहासिक तथा बहुआयामिक सम्बन्धलाई अझ प्रगाढ र मजबुत बनाउन महत्वपूर्ण भूमिका खेल्ने विश्वास व्यक्त गरेको छ ।
मन्त्रालयका अनुसार परराष्ट्रमन्त्री खनाल २४ जेठमा स्वदेश फर्कने कार्यक्रम रहेको छ ।
