गृहमन्त्री सुधन गुरुङविरुद्ध राष्ट्रिय मानव अधिकार आयोगमा उजुरी दर्ता गरिएको छ ।
शान्तिपूर्ण प्रदर्शनका क्रममा पक्राउ परेर प्रहरी हिरासतमा रहेका व्यक्तिहरूलाई हिरासतभित्रै पुगेर मानसिक दबाब दिएको तथा ज्यान मार्ने धम्की दिएको आरोप लगाउँदै आयोगमा निवेदन दर्ता गरिएको हो ।
अजय सोडारी, प्रकाश बम र सुजन पौडेलले सोमबार आयोगको केन्द्रीय कार्यालय पुल्चोक पुगेर उजुरी दर्ता गराएका हुन् । उनीहरूले राज्यको जिम्मेवार पदमा रहेका व्यक्तिबाट आफूहरूमाथि गम्भीर मानव अधिकार उल्लंघन भएको दाबी गरेका छन् ।
निवेदनमा उल्लेख भएअनुसार गत जेठ १९ गते कालापानी, लिपुलेक र लिम्पियाधुरासम्बन्धी सीमा विवादका विषयमा भारतीय दूतावासअगाडि गरिएको शान्तिपूर्ण प्रदर्शनका क्रममा उनीहरूलाई सोह्रखुट्टे प्रहरी वृत्तको टोलीले पक्राउ गरेको थियो ।
उनीहरूको दाबीअनुसार हिरासतमा राखिएको करिब आधा घण्टापछि गृहमन्त्री गुरुङको नेतृत्वमा आएको टोली अनधिकृत रूपमा हिरासत कक्षभित्र प्रवेश गरेको थियो । सो क्रममा मानसिक दबाब, धम्की तथा डर–त्रास सिर्जना गरिएको आरोप निवेदनमा उल्लेख गरिएको छ ।
उजुरीकर्ताहरूले घटनाको निष्पक्ष छानबिन गर्न राष्ट्रिय मानव अधिकार आयोगको विशेष टोली गठन गर्न माग गरेका छन् । साथै सोह्रखुट्टे प्रहरी वृत्तमा रहेका पीडितहरूको बयान संकलन गर्न, घटनादिनको सीसीटीभी फुटेज सुरक्षित राख्न तथा आगन्तुक अभिलेख नियन्त्रणमा लिएर अनुसन्धान गर्न आयोगसँग आग्रह गरेका छन् ।
आयोगले निवेदन दर्ता गरेपछि घटनाबारे आवश्यक अध्ययन तथा प्रक्रिया अघि बढाउने जनाएको छ ।
