सप्तरीको सुरुङ्गा नगरपालिका–१ शिशुवारीमा श्रीमतीको हत्या गरेको आरोपमा प्रहरीले एक जनालाई पक्राउ गरेको छ । पक्राउ पर्नेमा स्थानीय ५६ वर्षीय कोसिया सदा रहेका छन् ।
प्रहरीका अनुसार सदाले आफ्नी ५२ वर्षीया श्रीमती फुलकुमारी सदालाई कुटपिट गर्नुका साथै इँटाले टाउकोमा प्रहार गरेका थिए । गम्भीर घाइते फुलकुमारीको उपचारका क्रममा मृत्यु भएपछि प्रहरीले यसअघि अभद्र व्यवहारसम्बन्धी कसुरमा दर्ता भएको मुद्दालाई कर्तव्य ज्यान मुद्दामा परिणत गरेको हो ।
जिल्ला प्रहरी कार्यालय सप्तरीका प्रहरी प्रवक्ता प्रहरी नायव उपरीक्षक हेमराज घिमिरेका अनुसार साउन २० गते साँझ करिब ६ बजे मादक पदार्थ सेवन गरेका कोसियाले फुलकुमारीलाई कुटपिट गरी इँटाले टाउकोमा प्रहार गरेका थिए ।
घटनाको जानकारी पाएलगत्तै इलाका प्रहरी कार्यालय भेडियाबाट खटिएको प्रहरी टोलीले घाइते फुलकुमारीलाई उद्धार गरी उपचारका लागि प्रादेशिक अस्पताल लहान, सिराहा पठाएको थियो । घटनापछि कोसियालाई इलाका प्रहरी कार्यालय कडरबोनाले अभद्र व्यवहारसम्बन्धी कसुरमा नियन्त्रणमा लिई अनुसन्धान अघि बढाएको थियो । प्रहरीले सप्तरी जिल्ला अदालतबाट साउन २० गतेदेखि लागू हुने गरी पाँच दिनको म्यादसमेत लिएको थियो ।
उपचाररत फुलकुमारीको साउन २४ गते बिहान करिब साढे ३ बजे प्रादेशिक अस्पताल लहानमा मृत्यु भएको प्रहरीले जनाएको छ । त्यसपछि मृतककी छोरी लिला सदाले दिएको जाहेरीका आधारमा अभद्र व्यवहारसम्बन्धी मुद्दालाई कर्तव्य ज्यान मुद्दामा परिणत गरिएको जिल्ला प्रहरी कार्यालय सप्तरीले जनाएको छ ।
मुद्दा कर्तव्य ज्यानमा परिणत भएपछि प्रहरीले पुनः सप्तरी जिल्ला अदालतबाट साउन २४ गतेदेखि लागू हुने गरी १० दिनको म्याद लिई कोसिया सदामाथि थप अनुसन्धान अघि बढाएको छ ।
