देशभर देखिएको रेबिजविरुद्धको खोप (एआरभी) अभावको असर मधेश प्रदेशका सरकारी स्वास्थ्य संस्थामा पनि परेको छ ।
सरकारी अस्पतालमा खोप नियमित रूपमा उपलब्ध नहुँदा कुकुर, स्याललगायत रेबिज शंकास्पद जनावरले टोकेका बिरामी निजी स्वास्थ्य संस्था तथा औषधि पसलबाट महँगो मूल्यमा खोप लगाउन बाध्य भएका छन् । वीरगंजस्थित नारायणी अस्पतालमा मात्रै दैनिक २० देखि ३० जनासम्म रेबिजविरुद्धको खोप लगाउन आउने गरेका छन् । तर अस्पतालमा करिब एक महिनादेखि खोप उपलब्ध छैन । अस्पतालका रेबिज फोकल पर्सन प्रह्लाद साहका अनुसार यहाँ मासिक करिब ५ सयदेखि ६ सय भाइल खोप खपत हुने गरेको छ ।
खोप अभावका कारण पर्सासहित बारा, रौतहट तथा सीमावर्ती भारतबाट आउने बिरामीसमेत प्रभावित भएका छन् । निजी स्वास्थ्य संस्थामा एक भाइल खोपका लागि करिब ६५० रुपैयाँसम्म खर्च हुने गरेको अस्पतालले जनाएको छ । यता, प्रादेशिक अस्पताल जनकपुरमा भने पछिल्लो केही महिनादेखि रेबिज खोपको अभाव नरहेको अस्पतालका निर्देशक डा. जामुनप्रसाद सिंहले जानकारी दिनुभयो । मधेशका अन्य जिल्लाका सरकारी स्वास्थ्य संस्थामा भने खोपको उपलब्धता कमजोर रहेको स्वास्थ्यकर्मीहरूले बताएका छन् ।
चिकित्सकहरूले रेबिजको जोखिमलाई सामान्य रूपमा नलिन र जनावरले टोकेलगत्तै स्वास्थ्य संस्थामा पुगेर चिकित्सकीय परामर्शअनुसार खोपको पूरा मात्रा लगाउन आग्रह गरेका छन् । खोपको नियमित आपूर्ति नहुँदा न्यून आय भएका परिवार थप आर्थिक भारमा पर्ने भन्दै संघ, प्रदेश र स्थानीय तहबीच समन्वय गरी तत्काल आपूर्ति सहज बनाउनुपर्ने आवश्यकता देखिएको छ ।
