काठमाडौँ, भदौ २२ गते । बाढीबाट प्रभावित नेपाली नागरिकको राहत तथा उद्धारमा सहयोग पुर्याउने उद्देश्यले पाकिस्तानले नेपाललाई करिब १०० टन राहत सामग्री उपलब्ध गराएको छ।
पाकिस्तानबाट नेपाल पठाइएको राहत सामग्रीमा टेन्ट, कम्बल, म्याट, सरसफाइका सामग्री, औषधि तथा अन्य आवश्यक वस्तुहरू रहेका छन्। उक्त राहत सामग्री सोमबार काठमाडौँ आइपुगेको हो।
काठमाडौँमा आयोजित कार्यक्रममा विज्ञान, प्रविधि तथा नवप्रवर्तन मन्त्री महावीर पुनले नेपालका लागि पाकिस्तानका राजदूत आमिर खानबाट राहत सामग्रीको जिम्मेवारी ग्रहण गर्नुभएको छ।
पाकिस्तानको विदेश मन्त्रालयले सामाजिक सञ्जालमार्फत नेपालमा आएको बाढीबाट प्रभावित नागरिकलाई सहयोग पुर्याउन राहत सामग्री पठाइएको जानकारी दिएको छ। विपद्का बेला उपलब्ध गराइएको सहयोगले नेपाली जनताप्रति पाकिस्तानको ऐक्यबद्धता प्रतिबिम्बित गर्ने मन्त्रालयले जनाएको छ।
बाढीका कारण प्रभावित नागरिकलाई आवश्यक राहत उपलब्ध गराउने प्रयासमा पाकिस्तानले गरेको सहयोगले मानवीय सहायता तथा दुई देशबीचको मित्रवत् सम्बन्धलाई थप बलियो बनाउने अपेक्षा गरिएको छ।
