काठमाडौं । एनआईसी एशिया बैंकले बचतकर्ताको रकम दुरुपयोग गर्दै सञ्चालकहरू, तिनका परिवार र सम्बद्ध संस्थाहरूलाई पोस्ने गरेको अनियमितता सार्वजनिक भएको छ ।
नेपाल राष्ट्र बैंकले बैङ्किङ ठगीको यो प्रकरणलाई वित्तीय अपराध मानेर कारबाही अघि बढाएको छ । राष्ट्र बैंकको प्रारम्भिक अनुसन्धानले एनआईसी एशिया बैंकका अध्यक्ष तुलसीराम अग्रवाल, सञ्चालक त्रिलोकचन्द्र अग्रवाल, रामचन्द्र संघाई, तिनका परिवार र उनीहरूको कम्पनीहरूलाई अधिक ब्याज दिन फिक्स डिपोजिट खाता खोल्दा मिति किर्ते गरेको पाइएको छ ।
राष्ट्र बैंकका अनुसार बैङ्कका सीईओ रोशन न्यौपानेको निर्देशनमा यो अपचलन भएको हो। राष्ट्र बैंकले अध्यक्षसहित सीईओ र दुई सञ्चालकलाई अनियमिततामा संलग्न रहेको ठहर गर्दै कारबाही गरेको छ ।
अनियमितताको विवरण
- अधिक ब्याज: सामान्य ग्राहकलाई भन्दा एकदेखि तीन तह बढी ब्याज ।
- मिति किर्ते: पुरानो मिति कायम गरी छिटो पाको देखाएर ब्याज दिने ।
- संलग्न व्यक्ति: अध्यक्ष, सञ्चालक, तिनका परिवार, र तिनका संस्थाहरू ।
- कानूनी कारबाही: राष्ट्र बैंक ऐन, २०५८ अनुसार नसिहत तथा सचेत गराइएको ।
राष्ट्र बैंकका प्रवक्ता रामु पौडेलले उक्त बैंकलाई सचेत गराउँदै अधिक ब्याज फिर्ता गराइसकिएको र गल्ती नगर्न निर्देशन दिएको बताए ।
तर, एनआईसी एशिया बैंकले राष्ट्र बैंकको दाबीलाई अस्वीकार गर्दै पुरानै ब्याजदरको कारण अनियमितता देखिएको बताएको छ । बैंकका सूचना अधिकारी अर्जुनराज खनियाले सेवाग्राहीको आग्रहमा यस्तो निर्णय गरेको बताएका छन् ।
राष्ट्र बैंकले उक्त प्रकरणमा बैंकिङ प्रणालीमा थप सुधारको आवश्यकतामा जोड दिँदै आगामी दिनमा यस्ता घटनाहरूलाई नदोहोर्याउन आग्रह गरेको छ ।
