कृतिक विपद्का बेला प्रभावित परिवारलाई सहयोग गर्न धेरै व्यक्ति तथा संस्था अघि बढ्छन्। तर यही संवेदनशील अवस्थाको फाइदा उठाउँदै जोखिममा रहेका बालबालिकालाई लक्षित गरी गैरकानुनी गतिविधि हुनसक्ने खतरा पनि बढ्ने गरेको छ।
भोटेकोशीमा आएको बाढीले रसुवासहित नुवाकोट, धादिङ, चितवन, गोरखा, तनहुँ र नवलपरासीसम्म ठूलो क्षति पुर्याएको छ। यीमध्ये रसुवा, नुवाकोट र धादिङ बढी प्रभावित भएका छन्। बाढी तथा त्यसपछिको विपद्का कारण १ हजार ३ सयभन्दा बढी मानिसको मृत्यु भएको पुष्टि भएको छ। विपद् प्रभावितमध्ये रसुवामा मात्रै ३ हजार ६५० बालबालिकासहित १४ हजार ४६१ जना विस्थापित भएको तथ्यांक सार्वजनिक भएको छ। एडीआरआरएमएको भदौ १९ गतेको तथ्यांकअनुसार विपद् प्रभावित क्षेत्रबाट उद्धार गरिएका प्रत्येक ४० जनामध्ये करिब ७ जना बालबालिका रहेका छन्। ठूलो जनधनको क्षतिसँगै परिवारका सदस्य गुमाएका वा घरपरिवारबाट अलग भएका बालबालिकाको संख्या पनि बढ्न सक्ने जोखिम छ। अभिभावक गुमाएका, परिवारसँग सम्पर्कविहीन भएका वा विद्यालय तथा समुदायको संरक्षणबाट टाढिएका बालबालिका यस्तो अवस्थामा थप असुरक्षित बन्न सक्छन्।
राहत, खाना, कपडा, अस्थायी बसोबास र हेरचाहको आवश्यकता पूरा गर्न उनीहरू अपरिचित व्यक्ति वा संस्थाको सम्पर्कमा पुग्नुपर्ने अवस्था आउन सक्छ। यही परिस्थितिलाई गलत नियत भएका व्यक्तिले दुरुपयोग गर्न सक्ने भएकाले बालबालिकाको उद्धार, स्थानान्तरण र राहत वितरणका क्रममा विशेष निगरानी आवश्यक देखिन्छ।
विपद्को समयमा बालबालिकालाई सुरक्षित स्थानमा राख्ने, अभिभावक वा परिवारसँग पुनर्मिलन गराउने तथा अपरिचित व्यक्तिको जिम्मा नलगाउने व्यवस्था प्रभावकारी बनाउनुपर्ने आवश्यकता छ। सहयोगका नाममा बालबालिकाको अधिकार र सुरक्षामाथि कुनै प्रकारको जोखिम उत्पन्न नहोस् भन्नेतर्फ सम्बन्धित निकाय, स्थानीय समुदाय र सहयोगी संस्थाहरू सचेत हुनुपर्ने देखिन्छ।
