प्रधानमन्त्री शाहले भोटेकोशी–त्रिशूली क्षेत्रमा आएको विनाशकारी बाढीलाई नेपालका लागि मात्र नभई समग्र विश्वका लागि चेतावनीका रूपमा लिनुपर्ने बताएका छन् ।
संयुक्त राष्ट्रसंघको महासभालाई सम्बोधन गर्दै प्रधानमन्त्री शाहले आफू सुदूर हिमाली देश नेपालबाट मानवजातिका लागि आउँदै गरेको चेतावनीसहित उपस्थित भएको बताए ।
उनले विकास, लोकतन्त्र, शान्ति र राष्ट्रको आशाबारे बोल्न चाहेको भए पनि अहिले महाविनाश र अभूतपूर्व मानवीय क्षतिबारे बोल्नुपर्ने अवस्था आएको बताए ।
प्रधानमन्त्री शाहले बाढीका कारण आफ्ना प्रियजन घर नफर्कने थाहा पाएर उनीहरूको प्रतीक्षामा रहेका परिवार, हिलो, ढुंगा र पानीमा आफन्त खोजिरहेका समुदाय तथा अझै शवसमेत फेला नपरेका परिवारको पीडालाई सम्बोधनमा उठाए ।
उनले केही मिनेटमै पुल, सडक, विद्यालय, घर तथा नागरिकका जीविकोपार्जनका साधन बगाएको उल्लेख गर्दै यस विपत्तिले नेपालको दिगो विकासका लक्ष्य हासिल गर्ने यात्रामा समेत अवरोध सिर्जना गरेको बताए ।
चार साताअघि नेपालको हिमाली क्षेत्रमा आएको विनाशकारी बाढीका तस्बिर विश्वले देखेको स्मरण गर्दै प्रधानमन्त्री शाहले उक्त विपत्तिलाई धेरैले ‘हिमालयन सुनामी’को संज्ञा दिएको बताए ।
उनका अनुसार भोटेकोशी–त्रिशूली विपत्ति स्थानीय त्रासदीमा मात्र सीमित नभई विश्व समुदायका लागि एउटा गम्भीर चेतावनी हो ।
‘के हामीले त्यो चेतावनी वास्तवमै सुनेका छौँ भन्दै प्रधानमन्त्री शाहले जलवायु परिवर्तनबाट उत्पन्न जोखिमप्रति विश्व समुदायको ध्यानाकर्षण गराए ।
उनले झन्डै तीन वर्षअघि सगरमाथाको छायामा उभिएर संयुक्त राष्ट्रसंघका महासचिवले आसन्न जलवायु विपत्तिको भयावहताबारे मानवजातिलाई चेतावनी दिएको पनि स्मरण गरे ।
प्रधानमन्त्री शाहले नेपालको हिमाली क्षेत्रमा देखिएको विपत्तिलाई जलवायु परिवर्तन र त्यसबाट सिर्जित जोखिमबारे विश्वले गम्भीर रूपमा सोच्नुपर्ने विषयका रूपमा प्रस्तुत गरेका छन् ।
