संयुक्त राष्ट्रसङ्घको ८१औँ महासभामा सहभागी भएर प्रधानमन्त्री वालेन्द्र शाह शनिबार स्वदेश फर्किएका छन् ।
कतारको दोहा हुँदै काठमाडौं आइपुगेका प्रधानमन्त्री शाहलाई त्रिभुवन अन्तर्राष्ट्रिय विमानस्थलमा अर्थमन्त्री स्वर्णिम वाग्ले, गृहमन्त्री सुधन गुरुङ र पर्यटनमन्त्री खडक राज पौडेल ‘गनेस’ले स्वागत गरेका थिए । प्रधानमन्त्रीको स्वागतका लागि तीन मन्त्री विमानस्थल पुगे पनि विगतमा देखिने गरेको औपचारिक तामझाम भने यसपटक देखिएन । विमानस्थलमा न औपचारिक स्वागत समारोह आयोजना गरिएको थियो, न गार्ड अफ अनर र रेड कार्पेटको व्यवस्था नै गरिएको थियो ।
प्रधानमन्त्री शाह असोज ६ गते संयुक्त राष्ट्रसङ्घको महासभामा सहभागी हुन अमेरिकाको न्युयोर्क प्रस्थान गरेका थिए । प्रस्थानका क्रममा पनि विमानस्थलमा औपचारिक बिदाइ समारोह तथा गार्ड अफ अनरको व्यवस्था गरिएको थिएन।स्वदेश फर्किँदा पनि प्रधानमन्त्री शाहले सोही सादगीपूर्ण शैलीलाई निरन्तरता दिएका छन् । तीन मन्त्रीले स्वागत गरेपछि उनी विमानस्थलबाट बाहिरिएका थिए ।
प्रधानमन्त्री बनेपछि शाहको यो पहिलो विदेश भ्रमण हो। १४ सदस्यीय नेपाली प्रतिनिधिमण्डलको नेतृत्व गर्दै उनी संयुक्त राष्ट्रसङ्घको ८१औँ महासभामा सहभागी भएका थिए । न्युयोर्कमा रहँदा प्रधानमन्त्री शाहले संयुक्त राष्ट्रसङ्घका महासचिव एन्टोनियो गुटेरेससँग शिष्टाचार भेटवार्ता गरेका थिए । त्यसपछि उनले महासभालाई नेपालको तर्फबाट सम्बोधन गरेका थिए ।
महासभामा सम्बोधन गर्दै प्रधानमन्त्री शाहले नेपालमा पछिल्लो समय देखिएका जलवायुजन्य विपत्तिको विषयलाई प्रमुखताका साथ उठाएका थिए । उनले भोटेकोशी–त्रिशूली क्षेत्रमा आएको विनाशकारी बाढीलाई ‘हिमालयको सुनामी’को संज्ञा दिँदै जलवायु परिवर्तनका असरलाई गम्भीरतापूर्वक लिन विश्व समुदायसँग आग्रह गरेका थिए ।
नेपालले विश्वको कुल हरितगृह ग्यास उत्सर्जनमा ०.१ प्रतिशतभन्दा कम योगदान गरे पनि जलवायु परिवर्तनको ठूलो मूल्य चुकाइरहेको शाहको भनाइ थियो । उनले हिमनदी पग्लिने, पहाडी ढलान अस्थिर हुने, बाढी तथा पहिरोको जोखिम बढ्ने र त्यसबाट जनधन तथा पूर्वाधारमा क्षति पुग्ने अवस्थाप्रति अन्तर्राष्ट्रिय समुदायको ध्यानाकर्षण गराएका थिए ।
भिडियाे रिपाेर्ट
