सशस्त्र प्रहरी बल नेपालले पछिल्लो तीन महिनाको अवधिमा मधेश प्रदेशबाट २७ करोड ८५ लाख रुपैयाँभन्दा बढी मूल्यको अवैध सामान बरामद गरेको छ ।
सशस्त्र प्रहरीका अनुसार बरामद सामानमा किराना सामग्री, लत्ताकपडा, सुर्तीजन्य पदार्थ, इलेक्ट्रोनिक्स, हार्डवेयर, मोटरपार्ट्स तथा कस्मेटिकलगायत सामग्री रहेका छन् । अवैध सामान ओसारपसारमा प्रयोग भएका १० करोड २२ लाख रुपैयाँभन्दा बढी मूल्यका सवारीसाधनसमेत नियन्त्रणमा लिएर भन्सार कार्यालयमा दाखिला गरिएको सशस्त्र प्रहरीले जनाएको छ।
सोही अवधिमा ३० लाख रुपैयाँभन्दा बढी मूल्यको एक हजार १०० क्युबिक फिट काठ तथा १०२ ग्राम चाँदीसमेत बरामद गरिएको छ। अवैध कारोबारमा संलग्न ८४ जनालाई नियन्त्रणमा लिएर सम्बन्धित निकायमा बुझाइएको जनाइएको छ ।
मधेश प्रदेशका सीमा क्षेत्रमा हुने लागूऔषध ओसारपसार नियन्त्रणका लागि समेत सशस्त्र प्रहरीले सक्रियता बढाएको जनाएको छ । तीन महिनाको अवधिमा १९३ ग्राम ब्राउन सुगर, ९ किलो ५०० ग्राम चरेस र एक हजार ६६६ किलोग्रामभन्दा बढी गाँजा बरामद गरिएको सशस्त्र प्रहरीले जनाएको छ ।
यसैगरी, तीन थान कटुवा पेस्तोल, दुई थान सिक्सर, दुई थान भरुवा बन्दुक तथा त्यसका राउन्ड र बारुदसमेत बरामद गरिएको छ । मानव बेचबिखनको आशंकामा २९ महिला र ३० पुरुष गरी ५९ जनालाई नियन्त्रणमा लिएर आवश्यक अनुसन्धानका लागि सम्बन्धित निकायमा बुझाइएको सशस्त्र प्रहरीले जनाएको छ ।
सशस्त्र प्रहरीले मधेश प्रदेशका विभिन्न नदीजन्य क्षेत्रमा अवैध उत्खननमा प्रयोग भएका २२ वटा ट्याक्टर, २६ वटा टिपर र दुई वटा जेसीबीसमेत नियन्त्रणमा लिएको छ।
सीमा क्षेत्रमा हुने अवैध गतिविधि नियन्त्रणका लागि सशस्त्र प्रहरीले बाहिनीमा वरिष्ठ अधिकृतको कमान्डमा स्ट्राइकिङ टोली परिचालन गरेको जनाएको छ। सीमा क्षेत्रको अनुगमनका लागि गणहरूमा समेत अधिकृत खटाइएको जनाइएको छ।
सशस्त्र प्रहरीका अनुसार नेपाल–भारत खुला सीमाबाट हुने तस्करी, मानव बेचबिखन तथा सीमा अपराध नियन्त्रणका साथै दशगजा क्षेत्रको सुरक्षा र सीमा अतिक्रमण रोक्न सम्बन्धित निकाय तथा भारतीय सुरक्षा निकायसँग समन्वय भइरहेको छ।
सीमा चिह्नको डिजिटल अभिलेख तथा भौतिक अवस्थाको अद्यावधिक गर्ने, सीमा स्तम्भको मर्मतसम्भारका लागि भारतीय समकक्षी सुरक्षा निकायसँग समन्वय गर्ने तथा सीमा क्षेत्रमा हुने अवैध गतिविधि नियन्त्रणलाई प्राथमिकतामा राखिएको सशस्त्र प्रहरीले जनाएको छ।
भिडियाे रिपाेर्ट
