जनकपुरधाम । नेपाली कांग्रेसका नेता एवं मधेश प्रदेशसभा सदस्य रामसरोज यादवले पार्टी सभापति गगनकुमार थापामाथि गरिएको ‘ग्याङ्स्टर’ टिप्पणीप्रति आपत्ति जनाउनुभएको छ ।
जनकपुरधाम उपमहानगर अधिवेशनलाई सम्बोधन गर्दै यादवले सभापति थापामाथि तल्लो स्तरको टिप्पणी गर्नेहरूप्रति असन्तुष्टि जनाउँदै सार्वजनिक रूपमा नेताहरूले संयमित भाषा प्रयोग गर्नुपर्ने बताउनुभयो ।
नाम नलिई कांग्रेसका एक पूर्वउपसभापतिप्रति लक्षित गर्दै यादवले पार्टीका जिम्मेवार तहमा रहेका नेताहरूबाट पछिल्लो समय आएका अभिव्यक्ति उचित नभएको टिप्पणी गर्नुभयो । डिजिटल युगमा नेताहरूका विगत र वर्तमानका अभिव्यक्ति सार्वजनिक अभिलेखमा रहने भएकाले सबैले आफ्नो अभिव्यक्तिप्रति जिम्मेवार हुनुपर्ने उहाँको भनाइ थियो ।
यादवले गगन थापालाई विगतमा नेता तथा भावी प्रधानमन्त्री भन्दै समर्थन गर्नेहरूले अहिले उनैप्रति आपत्तिजनक टिप्पणी गर्नु विरोधाभासपूर्ण रहेको बताउनुभयो ।
“विनाश आउने बेलामा बुद्धि बिग्रिन्छ । जसले गगन थापालाई ‘ग्याङ्स्टर’ भन्छन्, उनीहरूको शब्द चयन नै दुर्भाग्यपूर्ण छ,” यादवले भन्नुभयो ।
कांग्रेस लोकतान्त्रिक पार्टी भएकाले राजनीतिमा नैतिकता र इमानदारितालाई प्राथमिकता दिनुपर्ने यादवले बताउनुभयो। पुरानो पुस्ताका नेताहरूले नयाँ पुस्तालाई नेतृत्वमा अवसर दिनुपर्नेमा उहाँले जोड दिनुभयो ।
देशका विभिन्न राजनीतिक परिवर्तनमा युवाहरूको महत्वपूर्ण भूमिका रहेको उल्लेख गर्दै यादवले आगामी राजनीतिमा पनि युवा पुस्तालाई पर्याप्त अवसर दिनुपर्ने धारणा राख्नुभयो ।
सार्वजनिक मञ्चबाट प्रयोग गरिने अमर्यादित भाषाले पार्टीका नेता–कार्यकर्ता तथा आम नागरिकमा गलत सन्देश जाने भन्दै यादवले नेताहरूलाई संयमित र मर्यादित अभिव्यक्ति दिन आग्रह गर्नुभयो ।
