चीनसँग जोडिएका प्रमुख तीन व्यापारिक नाका बन्द भएपछि दसैँका लागि आयात गरिएका लत्ताकपडा, विद्युतीय सवारीसहितका सामान चीनतर्फ नै रोकिएका छन्।
रसुवागढी नाका भोटेकोशी नदीमा आएको बाढीले क्षतिग्रस्त भएपछि व्यापार ठप्प छ। त्यस्तै, तातोपानी नाकाबाट हुने कार्गो जाँचपाससमेत रोकिएको छ। यी दुई नाका बन्द भएपछि चीनबाट सामान ल्याउने प्रमुख विकल्प बनेको मुस्ताङको कोरला नाका पनि लगातारको वर्षा र पहिरोका कारण बन्द भएको हो।
कोरला नाकाबाट पछिल्लो समय विद्युतीय सवारीसँगै लत्ताकपडालगायतका सामानसमेत आयात हुँदै आएका थिए । तर नाका र सडक अवरुद्ध भएपछि दसैँका लागि चीनबाट ल्याइएका सामान सीमापारि नै रोकिएका छन् ।
नेसनल बिजनेस ट्रेड सेन्टर (एनबिटिसी) का सञ्चालक गोपाल पङ्गेनीका अनुसार दसैँका लागि ल्याइएका लत्ताकपडाका धेरै कन्टेनर चीनतर्फ रोकिएका छन्। उहाँका अनुसार हालसम्म दसैँ लक्षित करिब २५ प्रतिशत कपडा मात्रै नेपाल आइपुगेको छ ।
नाका केही दिनमै खुले पनि दसैँअघि सबै सामान नेपाल ल्याउन कठिन हुने व्यापारीहरूको भनाइ छ। त्यसैले यसपटक बजारमा नयाँ सामानभन्दा केही महिनाअघि आयात गरिएको पुरानो स्टकबाटै दसैँको माग धान्नुपर्ने अवस्था आउन सक्ने उनीहरू बताउँछन् ।
कोरला नाका बन्द हुँदा विद्युतीय सवारी आयातकर्तासमेत प्रभावित भएका छन् । बिवाइडीका केही गाडी भन्सार जाँचपास भइसके पनि धेरै सवारी चीनतर्फ नै रोकिएको साइमेक्स इङ्कका राष्ट्रिय बिक्री प्रमुख आशुतोष गौतमले बताउनुभयो ।
उहाँका अनुसार सडक छिट्टै सञ्चालनमा नआए दसैँ लक्षित सवारी बिक्रीमा असर पर्न सक्छ। दसैँको समयमा सवारी विक्रेताले व्यापार प्रवर्धनका कार्यक्रम सञ्चालन गर्ने भएकाले यो अवधिमा सवारीको माग र आयात बढ्ने गर्छ ।
कन्टेनरको समेत अभाव
नाका बन्दसँगै चीनबाट सामान ढुवानी गर्ने कन्टेनरको समेत अभाव भएको व्यापारीहरूले बताएका छन्। रसुवाको बाढीमा तीन सयभन्दा बढी कन्टेनर बगेपछि ढुवानी साधनको अभाव भएको उनीहरूको भनाइ छ ।
एनबिटिसीका सञ्चालक पङ्गेनीका अनुसार रसुवागढीमा रोकिएका सामान कोरला हुँदै काठमाडौं ल्याउनसमेत कन्टेनर अभाव भएको छ। बाढीमा चालकको समेत ज्यान गएकाले चालकको अभाव पनि थपिएको उहाँले बताउनुभयो ।
कन्टेनरको भाडा सामान्यभन्दा चार गुणासम्म बढ्दा पनि सहज रूपमा कन्टेनर पाउन नसकेको व्यापारीहरूको गुनासो छ। त्यसमाथि कोरला क्षेत्रमा सामान भण्डारण गर्ने पर्याप्त गोदामको अभाव रहेकाले नाका खुले पनि सामान व्यवस्थापनमा चुनौती देखिएको छ ।
