नेपाली बजारमा बिक्री भइरहेको रारा ब्रान्डको तयारी चाउचाउको एक ब्याच गुणस्तर परीक्षणमा न्यूनस्तरको पाइएपछि बजारबाट फिर्ता गर्न निर्देशन दिइएको छ ।
खाद्य प्रविधि तथा गुण नियन्त्रण विभागले हिमश्री फुड्स प्रालिलाई सम्बन्धित ब्याचका चाउचाउ तत्काल बजारबाट उठाउन तथा थप बिक्री–वितरण रोक्न निर्देशन दिएको हो ।
विभागका अनुसार नियमित बजार अनुगमनका क्रममा खाद्य स्वच्छता तथा गुणस्तर ऐन, २०८१ अनुसार रारा चाउचाउको नमुना संकलन गरी प्रयोगशालामा परीक्षण गरिएको थियो। परीक्षणबाट उक्त नमुना खाद्य पदार्थका लागि तोकिएको गुणस्तर मापदण्डअनुसार नरहेको पुष्टि भएको विभागले जनाएको छ ।
पोखराको औद्योगिक क्षेत्रमा रहेको हिमश्री फुड्सले उत्पादन गरेको ६० ग्रामको रारा चाउचाउको ‘आरईजी ०१’ ब्याच परीक्षणमा परेको हो। उक्त ब्याचको उत्पादन मिति सन् २०२६ फेब्रुअरी ५ रहेको छ ।
कम्पनीले उत्पादन मितिदेखि १२ महिनासम्म उपभोग गर्न सकिने अवधि तोकेको भए पनि गुणस्तर परीक्षणमा न्यूनस्तरको देखिएपछि सम्बन्धित ब्याचका उत्पादन बजारबाट हटाउन विभागले निर्देशन दिएको जनाएको छ ।
विभागले उक्त ब्याचका चाउचाउ बिक्री–वितरण नगर्न र बजारमा रहेका सबै प्याकेट फिर्ता ल्याउन उत्पादक तथा व्यवसायीलाई सचेत गराएको छ। साथै, उपभोक्तालाई पनि उत्पादन मिति र ब्याच नम्बर जाँच गरेर सम्बन्धित उत्पादन खरिद तथा उपभोग नगर्न आग्रह गरिएको छ ।
