रुपन्देहीको तिलोत्तमा नगरपालिकाबाट १० वर्षीया बालिकालाई अपहरण गरी जंगलमा लुकाएको आरोपमा प्रहरीले एक युवकलाई गोली प्रहार गरी पक्राउ गरेको छ ।
तिलोत्तमा नगरपालिका–१७ दरखसवाका २७ वर्षीय युवराज थारुलाई आइतबार राति तिलोत्तमाकै कान्छी बजारस्थित जंगलबाट प्रहरीले नियन्त्रणमा लिएको हो। पक्राउ गर्ने क्रममा थारुले प्रहरीमाथि आक्रमणको प्रयास गरेपछि एक राउन्ड गोली चलाइएको प्रहरीले जनाएको छ। गोली लागेर उनको खुट्टामा चोट लागेको छ। उनलाई उपचारका लागि लुम्बिनी प्रादेशिक अस्पताल लगिएको छ ।
प्रहरीका अनुसार थारुले बुधबार राति घरमा सुतिरहेकी बालिकालाई अपहरण गरी जंगलतर्फ लगेका थिए। राति करिब २ बजेतिर बालिकालाई ओढाउन खोज्दा हजुरआमाले उनलाई घरमा नभेटेपछि परिवारले खोजी सुरु गरेको थियो। त्यसपछि घटनाबारे प्रहरीलाई जानकारी गराइएको थियो ।
बालिका हराएको सूचना पाएलगत्तै प्रहरीले स्थानीय बस्ती, आसपासका क्षेत्र तथा जंगलमा खोजी अभियान सञ्चालन गरेको थियो। खोजीका क्रममा शुक्रबार साँझ कान्छी बजारस्थित जंगलबाट अपहरण भएको करिब ३८ घण्टापछि बालिकालाई सकुशल उद्धार गरिएको प्रहरीले जनाएको छ ।
बालिका फेला परेको स्थानबाट भेटिएको मोबाइल फोनलगायतका आधारमा प्रहरीले अपहरणमा संलग्न व्यक्तिको पहिचान गरेको थियो। त्यसपछि फरार रहेका थारुको खोजीलाई तीव्र बनाइएको थियो। उनी जंगलमै लुकेर बसेको आशंकामा प्रहरीले विभिन्न क्षेत्रमा निगरानी बढाएको थियो ।
आइतबार राति जंगलमा खोजी गर्ने क्रममा थारुलाई प्रहरीले फेला पारेको थियो। नियन्त्रणमा लिन खोज्दा उनले प्रहरीमाथि आक्रमणको प्रयास गरेपछि गोली चलाउनुपरेको प्रहरीको भनाइ छ। गोली लागेपछि उनलाई नियन्त्रणमा लिएर उपचारका लागि अस्पताल पठाइएको हो ।
उद्धार गरिएकी बालिका हाल प्रहरीको सुरक्षामा रहेको आश्रयस्थलमा राखिएको प्रहरीले जनाएको छ। उनको स्वास्थ्य परीक्षणसमेत गरिएको र हाल स्वास्थ्य अवस्था सामान्य रहेको बताइएको छ ।
बालिकाका आफन्तका अनुसार परिवार आर्थिक रूपमा कमजोर छ र बालिकाका आमाबुवा मजदुरी गर्दै आएका छन्। बालिका हजुरबा–हजुरआमासँग बस्दै आएकी थिइन् ।
प्रहरीले घटनाको थप अनुसन्धान भइरहेको जनाएको छ। अपहरणको उद्देश्य, घटनामा अन्य व्यक्तिको संलग्नता तथा बालिकाले दिएको विवरणका आधारमा अनुसन्धान अघि बढाइने प्रहरीले जनाएको छ ।
