नेपाली कांग्रेसको १५औँ राष्ट्रिय महाधिवेशन आजदेखि काठमाडौंको खुलामञ्चमा सुरु हुँदैछ। असोज २२ गतेसम्म सञ्चालन हुने महाधिवेशनमा देशभरका विभिन्न जिल्ला तथा विदेशस्थित जनसम्पर्क समितिबाट सात हजारभन्दा बढी प्रतिनिधि सहभागी हुने जनाइएको छ ।
महाधिवेशनमा सहभागी हुन देशका विभिन्न स्थानबाट प्रतिनिधि तथा शुभेच्छुकहरू काठमाडौं आउने क्रम बढेसँगै राजधानीको यातायात व्यवस्थापनलाई पनि प्राथमिकतामा राखिएको छ। सम्भावित सवारी चापलाई मध्यनजर गर्दै ट्राफिक प्रहरीसँगको समन्वयमा विशेष पार्किङ व्यवस्था मिलाइएको आयोजकले जनाएको छ ।
महाधिवेशन यातायात व्यवस्थापन समितिका संयोजक विजयबहादुर स्वाँरका अनुसार प्रतिनिधि तथा सहभागीका सवारीसाधनका लागि धरहराको अन्डरग्राउन्ड, माइतीघरदेखि भद्रकालीसम्मको वान–वे सडकको एकतर्फी भाग र दरबारमार्गस्थित अन्नपूर्ण होटल परिसरलाई मुख्य पार्किङ स्थलका रूपमा तोकिएको छ ।
यस्तै, पुरानो बसपार्क क्षेत्र र भृकुटीमण्डपभित्र समेत सवारीसाधन पार्किङको व्यवस्था मिलाउने विषयमा ट्राफिक प्रहरीसँग समन्वय भइरहेको समितिले जनाएको छ ।
महाधिवेशन अवधिभर प्रतिनिधि, शुभेच्छुक तथा सर्वसाधारणको आवागमनलाई सहज बनाउन यातायात व्यवस्थापनमा विशेष ध्यान दिइएको आयोजकको भनाइ छ। सम्भावित भीड र सवारी चापलाई व्यवस्थित गर्दै काठमाडौं उपत्यकाको यातायातलाई सहज बनाउने तयारी गरिएको छ ।
