नेपाली कम्युनिष्ट पार्टी (नेकपा) का संयोजक एवं पूर्वप्रधानमन्त्री पुष्पकमल दाहाल ‘प्रचण्ड’ले नेपाली कांग्रेसका सभापति गगनकुमार थापालाई पार्टीको नेतृत्वमा मात्रै सीमित नरही मुलुककै नेतृत्व गर्ने दिशामा अघि बढ्न आग्रह गरेका छन् ।
नेपाली कांग्रेसको १५औँ महाधिवेशनको उद्घाटन समारोहलाई सम्बोधन गर्दै प्रचण्डले कांग्रेसले नेतृत्वमा निरन्तरताको क्रमभङ्ग गर्दै नयाँ इतिहास निर्माण गर्न खोजेको भन्दै त्यसलाई सकारात्मक रूपमा लिएको बताए । उनले सभापति थापाको नेतृत्व क्षमताको प्रशंसा गर्दै अब देशको नेतृत्व गर्ने अवसरसमेत प्राप्त हुन सक्ने धारणा व्यक्त गरे ।
आफू प्रधानमन्त्री हुँदा गगन थापा स्वास्थ्य तथा जनसंख्यामन्त्री रहेको स्मरण गर्दै प्रचण्डले त्यतिबेलै थापामा नेतृत्व गर्ने क्षमता रहेको आफूले देखेको बताए । थापाको राजनीतिक यात्राले नयाँ उचाइ लिएको देख्दा आफू खुसी भएको उल्लेख गर्दै उनले कांग्रेसको नेतृत्वमा आएको परिवर्तनलाई मुलुकको राजनीतिक यात्राका लागि महत्त्वपूर्ण घटनाका रूपमा व्याख्या गरे ।
‘गगनजीलाई बधाई छ। गगनजीमा नेतृत्व गर्ने क्षमता छ। अन्ततः यो देशको नेतृत्व गर्ने अवस्था आउन सक्छ भनेको थिएँ, आज त्यही देखिरहेको छु,’ प्रचण्डले भने ।
उनले कांग्रेसभित्र अझै पनि समेटिन बाँकी रहेका नेता तथा विभिन्न समूहलाई एकताबद्ध बनाएर अघि बढ्न सभापति थापालाई सुझाव दिए । पार्टीभित्रको आन्तरिक एकतालाई मजबुत बनाउँदै सबै पक्षलाई समेट्न सके कांग्रेसले राष्ट्रिय राजनीतिमा थप प्रभावकारी भूमिका निर्वाह गर्न सक्ने उनको भनाइ थियो ।
प्रचण्डले थापालाई देशको नेतृत्व गर्ने बाटोमा अघि बढ्न आफ्नो साथ र सहयोग रहने प्रतिबद्धतासमेत व्यक्त गरे। उनका अनुसार अहिलेको राजनीतिक परिस्थितिमा कुनै एक दलको आन्तरिक नेतृत्व परिवर्तनमा मात्रै सीमित नभई समग्र मुलुकको राजनीतिक स्थिरता, लोकतान्त्रिक मूल्य र राष्ट्रिय एकतालाई प्राथमिकता दिन आवश्यक छ।
उनले मुलुकमा गणतन्त्र र लोकतन्त्रसमेत जोखिममा पर्न सक्ने अवस्था देखिएको भन्दै सबै राजनीतिक दललाई सचेत र जिम्मेवार बन्न आग्रह गरे। लोकतान्त्रिक उपलब्धिको रक्षा गर्न राजनीतिक दलहरूबीच सहकार्य, संवाद र आपसी समझदारी आवश्यक रहेको उनको भनाइ थियो।
प्रचण्डले आफू र नेपाली कांग्रेसका तत्कालीन सभापति एवं पूर्वप्रधानमन्त्री गिरिजाप्रसाद कोइरालाबीच भएको विस्तृत शान्ति सम्झौताका केही महत्त्वपूर्ण काम अझै पूरा हुन बाँकी रहेको विषय पनि उठाए। शान्ति प्रक्रियाका बाँकी काम टुङ्ग्याउन वर्तमान कांग्रेस सभापति थापाले सक्रिय भूमिका खेल्नुपर्ने उनले बताए।
शान्ति सम्झौताका अधुरा कामलाई समयमै टुङ्ग्याउन नसकिए मुलुक पुनः द्वन्द्वतर्फ धकेलिन सक्ने जोखिम औँल्याउँदै प्रचण्डले संक्रमणकालीन न्याय र शान्ति प्रक्रियालाई निष्कर्षमा पुर्याउनुपर्नेमा जोड दिए।
‘शान्ति सम्झौताका केही चिज अझै टुङ्ग्याउन बाँकी छ। यो टुङ्गिएन भने देश फेरि अर्को द्वन्द्वमा जान सक्छ। यो पनि गगन थापाले पूरा गर्नुपर्ने छ,’ उनले भने।
प्रचण्डको सम्बोधनमा कांग्रेसको नयाँ नेतृत्वप्रतिको शुभेच्छासँगै राष्ट्रिय राजनीतिमा गगन थापाको सम्भावित भूमिकालाई लिएर पनि स्पष्ट सन्देश देखिएको छ। उनले पार्टीभित्रको एकता, लोकतान्त्रिक व्यवस्थाको संरक्षण र शान्ति प्रक्रियाका बाँकी काम पूरा गर्ने जिम्मेवारीलाई थापाको नेतृत्वसँग जोड्दै मुलुकको भावी राजनीतिक दिशामा कांग्रेसले महत्त्वपूर्ण भूमिका खेल्नुपर्ने धारणा राखेका छन्।
