टिकटकमा सस्तो सामानको विज्ञापन देखाएर ग्राहकलाई ठगी गर्ने क्रम बढेको छ। वास्तविक पसलको नाम, लोगो, फोटो र भिडियो चोरी गरी फेक अकाउन्ट बनाउने र त्यसमार्फत ग्राहकलाई सम्पर्क गरेर रकम असुल्ने गिरोह सक्रिय रहेको पाइएको छ ।
सल्यानकी हीरा योगी पनि यस्तै ठगीमा परेकी छन्। काठमाडौंको सुविधानगरस्थित आरभ फेन्सीको नाममा खोलिएको फेक टिकटक अकाउन्टबाट पाँच वटा टी–सर्ट अर्डर गरेकी योगीको खाताबाट विभिन्न प्रक्रिया पूरा गर्ने बहानामा करिब २६ हजार रुपैयाँ निकालिएको छ ।
त्यस्तै, टिकटकमा ‘फेशन सिल्पर’को भिडियो हेरेर बुट अर्डर गरेकी अनु फुयालले अग्रिम भुक्तानी गरेको २ हजार ६ सय रुपैयाँ गुमाएकी छन्। रकम पठाएपछि उनलाई सम्बन्धित अकाउन्टबाट ब्लक गरिएको थियो।
व्यवसायीहरूका अनुसार फेक अकाउन्टले वास्तविक पसलका फोटो–भिडियो चोरी गर्ने, सस्तो मूल्य राख्ने र डीएम, ह्वाट्सएप वा भाइबरमार्फत ग्राहकलाई सम्पर्क गर्ने गरेका छन्। पैसा पाएपछि सम्पर्कविहीन हुने वा अकाउन्टबाट ब्लक गर्ने गरिएको छ ।
नेपाल प्रहरीको साइबर ब्युरोका अनुसार टिकटक र फेसबुकबाट सामान अर्डर गर्दा ठगी भएको भन्दै उजुरी बढिरहेका छन्। ब्युरोका प्रवक्ता दीपकराज अवस्थीका अनुसार अहिलेसम्म यस्ता घटनामा करिब १० प्रतिशत रकम मात्रै फिर्ता गराउन सकिएको छ ।
साइबर ब्युरोले अनलाइनबाट सामान किन्नुअघि व्यवसायीको आधिकारिकता, ई–कमर्स पोर्टलमा सूचीकृत भए–नभएको र भुक्तानी विवरण जाँच गर्न आग्रह गरेको छ। ठगीमा परे तत्काल बैंक तथा वित्तीय संस्थालाई जानकारी गराउन पनि सुझाव दिइएको छ ।
