दसैँमा घर फर्किने यात्रुलाई लक्षित गर्दै असोज २३ गतेदेखि अग्रिम बस टिकट बुकिङ खुला गरिने भएको छ ।
यातायात व्यवस्था विभागमा नेपाल यातायात व्यवसायी राष्ट्रिय महासङ्घका अध्यक्ष पुण्यप्रसाद सिटौलासहित व्यवसायी तथा विभागका पदाधिकारीबीच भएको छलफलपछि अग्रिम टिकट बुकिङको मिति तय गरिएको हो ।
विभागका महानिर्देशक राजीव पोखरेलले दसैँका बेला यात्रुको चापलाई ध्यानमा राखेर सहज, सुरक्षित र व्यवस्थित यातायात सेवा उपलब्ध गराउने तयारी भइरहेको जानकारी दिनुभयो ।
राजधानी काठमाडौंलगायत मुख्य सहरबाट दसैँका बेला ठूलो सङ्ख्यामा यात्रु बाहिरी जिल्लातर्फ जाने भएकाले अग्रिम टिकट व्यवस्थापनसँगै सवारीसाधनको उपलब्धता र यात्रु सुरक्षालाई प्राथमिकतामा राखिएको विभागले जनाएको छ ।
यात्रुको चाप व्यवस्थापनका लागि यातायात व्यवसायी, सुरक्षा निकाय तथा सम्बन्धित सरोकारवाला निकायबीच आवश्यक समन्वय भइरहेको महानिर्देशक पोखरेलले बताउनुभयो ।
अग्रिम टिकट बुकिङ सुरु भएपछि यात्रुले समयमै टिकट लिन सक्ने र दसैँको समयमा हुने भीडभाड तथा टिकट अभावलाई केही हदसम्म व्यवस्थापन गर्न सहयोग पुग्ने विभागको अपेक्षा छ ।
दसैँ अवधिमा यात्रुलाई सुरक्षित रूपमा गन्तव्यसम्म पुर्याउन सवारीसाधनको नियमित अनुगमन तथा आवश्यक व्यवस्थापनसमेत गरिने विभागले जनाएको छ ।
