महोत्तरीको बर्दिबासबाट विद्युत् ट्रान्सफर्मरमा प्रयोग हुने तामाको क्वाइलसहित पाँच जना पक्राउ परेका छन्। प्रहरीले उनीहरू ट्रान्सफर्मर चोरीका घटनासँग जोडिएको हुन सक्ने आशंकामा अनुसन्धान अघि बढाएको छ ।
इलाका प्रहरी कार्यालय बर्दिबासका अनुसार असोज १९ गते साँझ करिब ७ बजे बर्दिबास नगरपालिका–१ स्थित हमाल टोलबाट ३३ केभी ट्रान्सफर्मरमा प्रयोग हुने तामाको क्वाइलसहित पाँच जनालाई नियन्त्रणमा लिइएको हो ।
पक्राउ पर्नेमा सर्लाहीको गोडैता नगरपालिका–६ बगदहका ३१ वर्षीय इन्द्रजित महतो तथा महोत्तरीको बर्दिबास नगरपालिका–८ हात्तीलेटका २९ वर्षीय दिनेशकुमार महतो, २७ वर्षीय भरत यादव, ३१ वर्षीय भुवन भुजेल र २८ वर्षीय जयराम ठाकुर रहेका छन् ।
प्रहरीका अनुसार कवाड व्यवसायी इन्द्रजित महतोले अन्य चार जनासँग मिलेर उक्त तामाको क्वाइल खरिद गरेको प्रारम्भिक बयान दिएका छन्। पाँचै जनालाई नियन्त्रणमा लिएर इलाका प्रहरी कार्यालय बर्दिबासमा राखिएको छ ।
उनीहरूमाथि अनुसन्धानका लागि महोत्तरी जिल्ला अदालतबाट पक्राउ परेकै मितिदेखि लागू हुने गरी पाँच दिनको म्याद थप गरिएको प्रहरीले जनाएको छ ।
ट्रान्सफर्मर चोरीका घटना महोत्तरीसहित धनुषा र सर्लाहीमा समेत निरन्तर भइरहेकाले पक्राउ परेकाहरूको अन्य घटनामा संलग्नता र चोरीको सञ्जालबारे प्रहरीले अनुसन्धान गरिरहेको छ ।
जिल्ला प्रहरी कार्यालय महोत्तरीका प्रहरी उपरीक्षक श्यामकृष्ण सारु मगरले अदालतबाट म्याद लिएर घटनाको गहिरो अनुसन्धान भइरहेको बताए। प्रहरीले ट्रान्सफर्मर चोरीमा संलग्न अन्य व्यक्ति तथा चोरीको सामान खरिद–बिक्रीमा संलग्न सञ्जालसम्म पुग्ने प्रयास गरिरहेको जनाएको छ।
महोत्तरीका प्रमुख जिल्ला अधिकारी इन्द्रदेव यादवले पनि ट्रान्सफर्मर चोरीका घटनालाई गम्भीर रूपमा लिएर अनुसन्धान भइरहेको बताए। उनका अनुसार चोरीमा संलग्न गिरोहसम्म पुग्न आवश्यक सबै कोणबाट अनुसन्धान अघि बढाइनेछ।
प्रदेश प्रहरी कार्यालयको तथ्याङ्कअनुसार आर्थिक वर्ष २०८२/०८३ मा मधेश प्रदेशमा ५८ वटा विद्युत् ट्रान्सफर्मर चोरी भएका छन्। त्यसमध्ये महोत्तरीमा मात्रै २८, सर्लाहीमा १७, धनुषामा १० र रौतहटमा ३ वटा ट्रान्सफर्मर चोरी भएका छन् ।
यी घटनामा २० वटा मुद्दा दर्ता हुँदा ६ जना पक्राउ परिसकेका छन्। लगातार भइरहेको ट्रान्सफर्मर चोरीले विद्युत् संरचनाको सुरक्षामाथि समेत प्रश्न उठाएको छ ।
