काठमाडौं । सरकारले निजामती प्रशासनका ४४ जना उपसचिवको सरुवा तथा पदस्थापन गरेको छ । भूमि व्यवस्था, सहकारी तथा गरिबी निवारण मन्त्रालय, संघीय मामिला तथा सामान्य प्रशासन मन्त्रालयलगायतका निकायले विभिन्न मन्त्रालय, विभाग तथा कार्यालयमा कार्यरत उपसचिवहरूको सरुवा र पदस्थापन गरेका हुन् ।
यसपटकको सरुवामा गृह मन्त्रालयको हेरफेर विशेष चर्चामा रहेको छ । गृह मन्त्रालयमा कार्यरत १७ जना उपसचिवलाई अन्य मन्त्रालय तथा विभिन्न निकायमा सरुवा गरिएको छ भने विभिन्न स्थानमा कार्यरत ६ जना उपसचिवलाई गृह मन्त्रालयमा ल्याइएको छ ।
यसअनुसार गृह मन्त्रालयबाट बाहिरिने उपसचिवको संख्या भित्रिनेभन्दा ११ जना बढी रहेको छ ।
सरुवा सूचीअनुसार निजामती सेवाका ७ जना उपसचिवलाई विभिन्न जिल्ला समन्वय समितिमा जिल्ला समन्वय अधिकारीको जिम्मेवारी दिइएको छ । त्यस्तै, दुई जना उपसचिवलाई स्थानीय तहको प्रमुख प्रशासकीय अधिकृतका रूपमा खटाइएको छ ।
सरुवा तथा पदस्थापनसँगै विभिन्न मन्त्रालय, विभाग, जिल्ला समन्वय समिति तथा स्थानीय तहमा प्रशासनिक जिम्मेवारीसमेत हेरफेर भएको छ । पछिल्लो सरुवाले संघीय प्रशासनअन्तर्गतका विभिन्न निकायमा कार्यरत उपसचिवहरूको जिम्मेवारी परिवर्तन गरेको हो ।
