सप्तरी । नेपाल कुशवाहा कल्याण समाज सप्तरीको अध्यक्षमा रामनारायण मेहता निर्वाचित हुनुभएको छ ।
शनिबार सम्पन्न समाजको पाँचौँ जिल्ला अधिवेशनबाट मेहता एक मतको झिनो अन्तरले अध्यक्षमा निर्वाचित हुनुभएको हो ।
अध्यक्ष पदका उम्मेदवार मेहताले ५७ मत प्राप्त गर्दा उहाँका निकटतम प्रतिस्पर्धी चेतनारायण मेहताले ५६ मत प्राप्त गर्नुभयो ।
सहमतिका आधारमा नयाँ नेतृत्व चयन गर्ने प्रयास असफल भएपछि निर्वाचन प्रक्रियामार्फत मेहताको नेतृत्वमा २५ सदस्यीय नयाँ कार्यसमिति चयन गरिएको निर्वाचन समितिका संयोजक जयप्रकाश महतोले जानकारी दिनुभयो ।
नयाँ कार्यसमितिको उपाध्यक्षमा शुभकलाल महतो, महिला उपाध्यक्षमा मुनी मेहता, सचिवमा राजाबाबु मेहता, सहसचिवमा रामशरण महतो र कोषाध्यक्षमा सूर्यनारायण महतो निर्वाचित हुनुभएको छ ।
त्यस्तै, १९ सदस्यीय कार्यसमितिमा १२ जना पुरुष र सात जना महिला निर्वाचित भएका छन् । चार वर्षे कार्यकालका लागि भएको निर्वाचनमा १२१ जनाले मतदान गरेका थिए ।
अध्यक्षमा निर्वाचित रामनारायण मेहता यसअघि समाजको सल्लाहकारको जिम्मेवारीमा रहनुभएको थियो । निर्वाचित भएपछि उहाँले सबैको साथ र सहयोग लिएर समाजको उत्थान तथा सशक्तीकरणका लागि काम गर्ने प्रतिबद्धता जनाउनुभएको छ ।
