चाडपर्वलाई लक्षित गरी प्रहरीले झण्डै ९ सय सुरक्षाकर्मी परिचालन गरेर विशेष सुरक्षा योजना लागू गरेको दाबी गरिरहँदा पनि सप्तरीमा जघन्य अपराधका घटना रोकिएका छैनन् । सुरक्षा व्यवस्था कडा पारिएको भनिए पनि जिल्लामा एक पुरुषको हत्या भएको छ भने मूर्ति विसर्जन गरेर घर फर्किँदै गरेकी एक महिला सामूहिक बलात्कारको सिकार भएकी छन् ।
गत मंगलबार दिउँसो छिन्नमस्ता गाउँपालिका–४ लालापट्टीका ५० वर्षीय अरबिन्द यादव धानखेतमा घाइते अवस्थामा फेला परेका थिए । पराल लगेको विषयमा विवाद हुँदा स्थानीय व्यक्तिहरूले उनीमाथि कोदालो प्रहार गरेको प्रारम्भिक विवरणमा उल्लेख छ ।
टाउकोमा गम्भीर चोट लागेर खेतमै ढलेका यादवलाई उपचारका लागि राजविराजस्थित गजेन्द्रनारायण सिंह अस्पताल लगिएको थियो । उपचारकै क्रममा सोही दिन दिउँसो पौने ४ बजे उनको मृत्यु भएको हो ।
घटनापछि मृतकका परिवारजनले सोही ठाउँका ६ जनाविरुद्ध जाहेरी दिएका छन् । मृतकका छोरा अजय यादवका अनुसार उनका बुबा कुटपिटबाट खेतमै ढले पनि परिवारले दुईदेखि तीन घण्टासम्म घटनाबारे थाहा पाउन सकेको थिएन ।
‘बुबालाई कुटपिट गर्नेहरूलाई हदैसम्मको कारबाही भए मात्रै हामीले न्याय पाउँछौँ,’ अजयले भने ।
घटनामा संलग्न रहेको आरोप लागेका ६ जनामध्ये चार जनालाई प्रहरीले नियन्त्रणमा लिएको छ भने दुई जना अझै फरार छन् । फरार आरोपितको खोजी भइरहेको र घटनाबारे थप अनुसन्धान जारी रहेको सप्तरीका प्रहरी प्रमुख प्रहरी उपरीक्षक रूपक खड्काले बताए ।
चाडपर्वका बेला सम्भावित आपराधिक गतिविधि नियन्त्रण गर्ने उद्देश्यले प्रहरीले झण्डै ९ सय सुरक्षाकर्मी परिचालन गरी विशेष सुरक्षा योजना लागू गरेको जनाएको छ । तर, सुरक्षा व्यवस्था कडा पारिएको दाबीका बीच हत्या र सामूहिक बलात्कारजस्ता गम्भीर अपराधका घटना सार्वजनिक हुनुले जिल्लाको सुरक्षा व्यवस्थामाथि प्रश्न उठाएको छ ।
विशेष सुरक्षा योजनाअन्तर्गत ठूलो संख्यामा सुरक्षाकर्मी परिचालन गरिए पनि नागरिकको जिउज्यान र सुरक्षाको प्रत्याभूति कसरी सुनिश्चित गर्ने भन्ने चुनौती सप्तरी प्रहरीसामु देखिएको छ ।
