सप्तरी | मधेस प्रदेशसभा सदस्य तथा पूर्वमन्त्री मोहम्मद समिमले आगामी स्थानीय तह निर्वाचनमा सप्तरी जिल्लाका सबै पालिकामा नेपाली कांग्रेसको झण्डा फहराउने पार्टीको सङ्कल्प रहेको बताएका छन् । उनले पार्टीलाई बलियो बनाउन नेता तथा कार्यकर्ताबीच एकता र सहकार्य आवश्यक रहेकोमा जोड दिएका छन् ।
नेपाली कांग्रेसको १५औँ महाधिवेशनमा केन्द्रीय सदस्यमा निर्वाचित पदाधिकारी तथा सदस्य, नगर कार्यसमिति, नगर सभापतिका प्रत्याशीलगायत बुथ कार्यसमितिका प्रतिनिधिलाई सम्मान तथा विजयादशमी, दीपावली, छठ र सामाचकेवा पर्वको अवसरमा बिहीबार आयोजित शुभकामना आदानप्रदान कार्यक्रममा समिमले यस्तो बताएका हुन् ।
उनले कांग्रेसकै नेतृत्व र पहलमा यस क्षेत्रको विकास भएको दाबी गर्दै पार्टीलाई थप सुदृढ बनाउन सबै नेता तथा कार्यकर्ता एकजुट हुनुपर्ने बताए । पार्टीभित्र विचारमा मतभिन्नता हुन सक्ने भए पनि निर्वाचनका बेला मत विभाजन हुन नहुने उनको भनाइ थियो ।
आन्तरिक प्रतिस्पर्धालाई स्वाभाविक रूपमा लिनुपर्ने उल्लेख गर्दै उनले निर्वाचनका बेला एकताबद्ध भएर पार्टीका उम्मेदवारलाई विजयी गराउनुपर्ने धारणा राखे ।
कार्यक्रममा क्षेत्र नम्बर ३ का क्षेत्रीय सभापति भूपेन्द्र यादवले नेपाली कांग्रेस जनताको सुखदुःखमा साथ दिने पार्टीका रूपमा स्थापित रहेको बताए । उनले क्षेत्रीय कार्यसमितिले जनताका समस्या, आवश्यकता र विकासका सवालमा निरन्तर साथ तथा सहयोग गरिरहेको उल्लेख गरे ।
यादवले आगामी निर्वाचनमा उम्मेदवार छनोट गर्दा वडा तथा पालिका कार्यसमितिको सिफारिसलाई आधार बनाइने स्पष्ट पारे । टिकट वितरणमा कुनै किसिमको पक्षपात वा अनियमितता नहुने बताउँदै उनले पार्टीको निर्णय र विधिअनुसार उम्मेदवार छनोट हुने भएकाले अनावश्यक आशङ्का नगर्न नेता तथा कार्यकर्तालाई आग्रह गरे ।
कार्यक्रममा नगर प्रमुखका प्रत्याशी दीपेन्द्र चौधरी, पूर्वनगर सभापति सुरेन्द्र गुप्ता, नगर सभापतिका प्रत्याशी हेमकान्त चौधरी तथा महाधिवेशन प्रतिनिधिहरू राजेन्द्रप्रसाद चौधरी, प्रभुनारायण चौधरी र रणजीत साहलगायतले पार्टी सङ्गठन बलियो बनाउन आपसी एकता, सहकार्य र जनतासँगको सम्बन्धलाई प्राथमिकता दिनुपर्ने धारणा राखेका थिए ।
नगर कार्यसमितिका उपसभापति इनु मेहराले स्वागत मन्तव्य व्यक्त गरेको कार्यक्रममा नगर सभापति दुर्गानन्द भगतले अध्यक्षता गरेका थिए। कार्यक्रमको सञ्चालन नगर कार्यसमितिका सचिव वीरेन्द्र पण्डितले गरेका थिए ।
पाँच सय जना नेपाली कांग्रेसमा प्रवेश
कार्यक्रमका अवसरमा शम्भुनाथ नगरपालिकाका वडा नम्बर ३, ६, ७, ८, १० र १२ का युवा, किसान, मजदुर तथा विभिन्न राजनीतिक दलमा आबद्ध र स्वतन्त्र व्यक्तिहरू नेपाली कांग्रेसमा प्रवेश गरेका छन् ।
पार्टी प्रवेश गर्नेहरूमा बलराम सरदार, विशेश्वर साह, मोहम्मद अकबर, वासुदेव राम, रामबाबु साह, काशिन्द्र भगत, सरोजकुमार पाल, दिनेश पाल, अरुणकुमार साह, कामेश्वर साह, सहदेव साह, कञ्चन भगत, मधुर साह, राजेन्द्र दास, बहादुर सदा, दीपकुमार साह, छोटे दास, अशोककुमार दास, अर्जुन दास, भूपनारायण राम, लक्ष्मी ठाकुर, आशिष चौधरी, धनिलाल चौधरी, दुर्गानन्द चौधरी, सत्यनारायण चौधरी, जगनारायण चौधरी, राजेन्द्रप्रसाद साह, मोहम्मद कमरुल, मोहम्मद जाहिर, मोहम्मद सदिक, शर्मिलादेवी साह, देवकुमारी चौधरी, विशुनदेव सदा, इब्राहिम मियाँ, परमेश्वरीदेवी चौधरी, सागर सरदार र शिवचन्द्र पण्डितलगायत रहेका छन् ।
आयोजकका अनुसार कार्यक्रममा पाँच सय जनाले नेपाली कांग्रेसको सदस्यता ग्रहण गर्दै पार्टी प्रवेश गरेका हुन् । नवप्रवेशीलाई स्वागत गर्दै नेताहरूले उनीहरूको सहभागिताले नगरमा सङ्गठन विस्तार तथा आगामी निर्वाचनको तयारीमा सहयोग पुग्ने विश्वास व्यक्त गरेका थिए ।
