भारतबाट नेपालमा लागुऔषध ब्राउन सुगर (खैरो हेरोइन) भित्र्याउन एकै परिवारका सदस्य परिचालन गरिएको घटना मोरङमा सार्वजनिक भएको छ । प्रहरीले भारतीय बाबु, आमा र छोरालाई २९ ग्राम ४८० मिलिग्राम खैरो हेरोइनसहित पक्राउ गरेपछि सीमापार लागुऔषध तस्करीमा परिवारकै संलग्नता खुलेको हो ।
मोरङको रंगेली नगरपालिका–४ स्थित चोप्राहा बोर्डरबाट सोमबार साँझ पक्राउ पर्नेमा भारतको बिहारस्थित अररिया जिल्लाका ४५ वर्षीय रघुनाथ पासवान, उनकी ४० वर्षीया श्रीमती सकुन्तला पासवान र १८ वर्षीय छोरा करण पासवान रहेका छन् ।
प्रहरीका अनुसार लागुऔषध ओसारपसारका लागि परिवारका सदस्यलाई फरक–फरक जिम्मेवारी दिइएको थियो । प्रारम्भिक अनुसन्धानमा रघुनाथले सुरुमा नेपाल प्रवेश गरी सीमा क्षेत्रको अवस्था र सुरक्षाकर्मीको गतिविधिबारे जानकारी लिएको खुलेको छ । त्यसपछि सुरक्षित बाटो भएको यकिन गरेर उनले श्रीमती र छोरालाई लागुऔषध बोकेर नेपाल पठाएका थिए ।
सकुन्तला र करण भारतबाट पैदल नेपालतर्फ आइरहेका बेला उनीहरूभन्दा केही पछाडि रघुनाथ पनि आउँदै थिए । विशेष सूचनाका आधारमा निगरानी गरिरहेको लागूऔषध नियन्त्रण ब्यूरो विराटनगर, इलाका प्रहरी कार्यालय रंगेली र कोशी प्रदेश प्रहरी कार्यालयको संयुक्त टोलीले उनीहरूलाई चोप्राहा बोर्डरमा रोकेको थियो ।
चेकजाँचका क्रममा सकुन्तलाले दाहिने हातको मुठ्ठीभित्र कालो प्लास्टिकमा लुकाएर राखेको अवस्थामा ब्राउन सुगर फेला परेको प्रहरीले जनाएको छ । त्यसपछि आमा र छोरालाई नियन्त्रणमा लिइएको थियो । श्रीमती र छोरा पक्राउ परेको देखेपछि भाग्न खोजेका रघुनाथलाई समेत प्रहरीले पछ्याएर पक्राउ गरेको थियो ।
मोरङ प्रहरीका सूचना अधिकारी प्रहरी नायब उपरीक्षक (डीएसपी) सन्तोष श्रेष्ठका अनुसार पक्राउ परेका तीनै जना भारतबाट नेपालतर्फ लागुऔषध आपूर्ति गर्ने कार्यमा लामो समयदेखि संलग्न रहेको प्रारम्भिक अनुसन्धानबाट खुलेको छ।
उनीहरूको गतिविधि र नेपाल प्रवेश गर्ने तरिकाले यो आकस्मिक नभई योजनाबद्ध कारोबार भएको देखिएको डीएसपी श्रेष्ठले बताए । सीमामा सुरक्षाकर्मीको निगरानी छल्न परिवारकै सदस्य परिचालन गरिएको घटनाले लागुऔषध तस्करीको बदलिँदो शैली उजागर गरेको उनको भनाइ छ ।
एउटै परिवारका तीन सदस्य पक्राउ पर्नुले सीमापार अवैध कारोबारमा तस्करहरूले अपनाउने संगठित रणनीतिबारे प्रश्न उठाएको छ । लागुऔषध ओसारपसारमा संलग्न व्यक्तिलाई पक्राउ गर्नुका साथै त्यसको स्रोत, गन्तव्य, खरिदकर्ता र कारोबारबाट लाभ लिने मुख्य व्यक्तिको पहिचान गर्नु पनि उत्तिकै आवश्यक रहेको प्रहरी अधिकारीहरू बताउँछन् ।
रंगेली घटनामा पक्राउ परेका तीनै जनाको सम्बन्ध र उनीहरूले सञ्चालन गर्दै आएको भनिएको लागुऔषध आपूर्ति सञ्जालबारे थप अनुसन्धान भइरहेको डीएसपी श्रेष्ठले जानकारी दिए ।
पक्राउ परेका तीनै जनालाई इलाका प्रहरी कार्यालय रंगेलीमा राखिएको छ । उनीहरूविरुद्ध लागुऔषध ऐनअन्तर्गत मुद्दा चलाउने प्रक्रिया अघि बढाइएको छ। इन्स्पेक्टर अशोककुमार झा नेतृत्वको टोलीले घटनाको थप अनुसन्धान गरिरहेको प्रहरीले जनाएको छ ।