बंगलादेशमा पूर्वप्रधानमन्त्री शेख हसिनाको पार्टी अवामी लिगले देशव्यापी बन्द आह्वान गरेपछि राजनीतिक हिंसा चर्किएको छ । विभिन्न क्षेत्रमा आगजनी, तोडफोड र झडपका घटना भइरहेका बेला सत्तारूढ बंगलादेश नेसनलिस्ट पार्टी (बीएनपी) का दुई नेताको हत्या भएको छ ।
बंगलादेशका प्रधानमन्त्री तारिक रहमानले पूर्वप्रधानमन्त्री हसिनाको पार्टी अवामी लिगमाथि देशलाई अस्थिर बनाउने षड्यन्त्र गरेको आरोप लगाएका छन् ।
भारतसँग सीमा जोडिएको उत्तरपश्चिमी जिल्ला लालमोनिरहाटमा बिहीबार आयोजित सभालाई सम्बोधन गर्दै प्रधानमन्त्री रहमानले अवामी लिगका समर्थकहरूले अशान्ति फैलाउन आगजनी र हत्याजस्ता गतिविधि गरिरहेको आरोप लगाए ।
स्थानीय सञ्चारमाध्यमका अनुसार बिहीबार प्रतिबन्धित अवामी लिग र त्यसका सहयोगी संगठनका नेता तथा बीएनपीका कार्यकर्ताबीच भएको झडपमा कम्तीमा चार जनाको मृत्यु भएको छ । बीबीसी बंगलाका अनुसार बुधबार नाराइलमा विरोध प्रदर्शनमा सहभागी भएर फर्किने क्रममा भएको आक्रमणमा बीएनपीका दुई नेताको हत्या भएको थियो । प्रहरीले आक्रमणमा प्रतिबन्धित अवामी लिगका नेता तथा कार्यकर्ता संलग्न रहेको जनाएको छ ।
न्यु एज पत्रिकाका अनुसार बिहीबारसम्म बंगलादेशका १८ जिल्लामा हिंसा फैलिएको थियो । मंगलबार रातिदेखि नै विभिन्न स्थानमा आगजनी, तोडफोड र घरेलु बम विस्फोटका घटना भएका थिए । प्रदर्शनकारीले बस, प्रहरी कार्यालय, बीएनपीका कार्यकर्ताका घर, पार्टी कार्यालय र ग्रामीण बैंकका शाखालाई निशाना बनाएका थिए ।
गोपालगन्जमा राजमार्गमा सवारीसाधन जलाउनुका साथै रुख ढालेर आवागमन अवरुद्ध गर्ने प्रयास गरिएको थियो । त्यहाँ प्रदर्शनकारीले प्रहरी कार्यालय, एक सांसदको निवास तथा उनका आफन्त र समर्थकका घरमा समेत आगजनी गरेको स्थानीय अधिकारीहरूले जनाएका छन् ।
त्यस्तै, चटगाउँमा पूर्वअन्तरिम सरकार प्रमुख मोहम्मद युनुसको पैतृक घरमा आगजनी गरिएको छ । राजधानी ढाकामा बिहान हुनुअघि विभिन्न स्थानमा घरेलु बम विस्फोट भएका थिए । नारायणगन्ज, मैमनसिंह र राजशाहीमा अज्ञात समूहले पाँचवटा बस र एउटा ट्रकमा आगजनी गरेको प्रहरीले जनाएको छ । ढाकामा भएका हिंसात्मक घटनामा कम्तीमा चार जना घाइते भएका छन् ।
हिंसात्मक गतिविधिमा संलग्न रहेको आरोपमा अवामी लिगका कैयौँ नेता तथा कार्यकर्ता पक्राउ परेका छन् । पक्राउ पर्नेमा पूर्वशिक्षामन्त्री नुरुल इस्लाम नाहिदसमेत रहेका छन् । ढाकामा प्रहरीले प्रतिबन्धित अवामी लिग र त्यसका सहयोगी संगठनका कम्तीमा ७१ जना नेता तथा कार्यकर्तालाई नियन्त्रणमा लिएको छ ।
यसअघि प्रधानमन्त्री रहमानले बीएनपीका सांसदहरूलाई आ–आफ्नो निर्वाचन क्षेत्रमा फर्केर स्थानीय कार्यकर्तासँगै सडकमा सक्रिय हुन निर्देशन दिएका थिए । उनले अवामी लिगका कार्यकर्ताको गतिविधिको प्रतिवाद गर्न सांसदहरू आफैँ अग्रसर हुनुपर्ने भन्दै सुरक्षाका लागि प्रशासनमाथि मात्रै निर्भर नहुन आग्रह गरेका थिए ।
भारतमा रहेकी शेख हसिनालाई बंगलादेश फर्काउने विषयमा समेत तनाव बढिरहेको छ । बंगलादेश सरकारले हसिनाले स्वेच्छाले फर्किएर कानुनी प्रक्रियाको सामना गर्ने इच्छा व्यक्त गरे पनि भारतसँग भएको द्विपक्षीय सन्धिअनुसार उनलाई सुपुर्दगी गर्नुपर्ने माग दोहोर्याएको छ ।
हसिना सत्ताबाट हटेपछि मोहम्मद युनुस नेतृत्वको अन्तरिम सरकारले अवामी लिगमाथि प्रतिबन्ध लगाएको थियो । प्रधानमन्त्री तारिक रहमान नेतृत्वको बीएनपी सरकारले फेब्रुअरी १२ मा भएको निर्वाचनबाट सत्ता सम्हालेपछि पनि उक्त प्रतिबन्धलाई निरन्तरता दिएको छ ।
यसैबीच, ढाका उच्च अदालतले देशका सबै सार्वजनिक विश्वविद्यालयका प्रवेश परीक्षा डिसेम्बर ३१ सम्म स्थगित गर्न आदेश दिएको छ । हिंसात्मक घटनाका कारण राजधानीसहित विभिन्न क्षेत्रमा सुरक्षा व्यवस्था कडा पारिएको छ ।