मधेश प्रदेशमा नेपाली कांग्रेस नेतृत्वको सरकार ढालेका तीन दलका नेताहरू प्रदेश प्रमुखको कार्यालय पुगेका छन् ।
नेकपा एमाले र नेपाली कम्युनिस्ट पार्टी (नेकपा) ले सरकारलाई दिएको समर्थन फिर्ता लिएपछि नेपाली कांग्रेस नेतृत्वको सरकार अल्पमतमा परेको थियो । त्यसपछि मुख्यमन्त्री कृष्णप्रसाद यादवले गत कात्तिक २८ गते प्रदेशसभा बैठकमै राजीनामा घोषणा गरेका थिए ।
नयाँ सरकार गठनका लागि प्रदेश प्रमुख डा. सुरेन्द्रलाभ कर्णले दिएको समयसीमा आज सकिँदै गर्दा तीन दलका नेताहरू एकैसाथ प्रदेश प्रमुखको कार्यालय पुगेका हुन् ।
प्रदेश प्रमुखको कार्यालय पुगेका नेताहरूमा तीनै दलका संसदीय दलका नेतासहित अन्य शीर्ष नेताहरू रहेका छन् ।
यद्यपि, उनीहरू नयाँ सरकार गठनका लागि औपचारिक रूपमा दाबी पेस गर्न पुगेका हुन् वा सरकार गठनबारे छलफल गर्न मात्रै पुगेका हुन् भन्ने विषयमा स्पष्ट भएको छैन ।
प्रदेश प्रमुखको कार्यालय पुगेका नेताहरूले पनि यसबारे कुनै प्रतिक्रिया दिएका छैनन् ।
नयाँ सरकार गठनका लागि तोकिएको समयसीमा आजै समाप्त हुने भएकाले मधेश प्रदेशमा सरकार गठनको प्रक्रिया र सत्ता समीकरणलाई चासोका साथ हेरिएको छ ।