बाराको सुवर्ण गाउँपालिकामा भारतीय नम्बर प्लेटको मोटरसाइकलको ठक्करबाट एक युवकको मृत्यु भएको छ । ठक्कर दिएपछि मोटरसाइकल चालक सवारीसाधनसहित फरार भएका छन् ।
बाराको सुवर्ण गाउँपालिका–३ स्थित सन्तगन्ज पुलनजिकै शनिबार साँझ सडकको छेउबाट पैदल हिँडिरहेका युवकलाई भारतीय नम्बर प्लेटको मोटरसाइकलले ठक्कर दिएको थियो । दुर्घटनामा गम्भीर घाइते भएका युवकको उपचारका क्रममा मृत्यु भएको हो ।
मृत्यु हुनेमा भारतको बिहार राज्यअन्तर्गत महुआवा थाना, महुआवा पञ्चायत वडा नम्बर–६ निवासी चन्द्रिका ठाकुरका अन्दाजी २५ वर्षीय छोरा विक्रम शर्मा रहेका छन् ।
दुर्घटनापछि गम्भीर घाइते भएका शर्मालाई उपचारका लागि नेशनल मेडिकल कलेज लगिएको थियो । उपचारकै क्रममा उनको मृत्यु भएको मृतकका बुवा चन्द्रिका ठाकुरले जानकारी दिएका छन्। उनका अनुसार मृतकको शव पोस्टमार्टमका लागि हाल नारायणी अस्पतालमा राखिएको छ ।
ठाकुरका अनुसार सन्तगन्ज नाका र गाउँ नजिकै भएकाले शर्मा पैदल घुम्न निस्किएका बेला दुर्घटनामा परेका थिए । प्रहरी ड्युटी रहेको स्थानबाट करिब १० मिटरको दूरीमा दुर्घटना भएको दाबी गर्दै उनले घटनामा संलग्न मोटरसाइकल र चालकलाई प्रहरीले नै भगाएको आरोपसमेत लगाएका छन् ।
दुर्घटनामा संलग्न मोटरसाइकल र चालकलाई प्रहरीले अहिलेसम्म नियन्त्रणमा लिन नसकेको उनको भनाइ छ । ठक्कर दिने मोटरसाइकलको पहिचानसमेत हुन नसकेको उनले बताए ।
यता, जिल्ला प्रहरी कार्यालय बाराका प्रवक्ता एवं प्रहरी नायब उपरीक्षक मीनबहादुर घलेले घटनाबारे अनुसन्धान भइरहेको बताएका छन् । उनका अनुसार दुर्घटनामा संलग्न भारतीय नम्बर प्लेटको मोटरसाइकल र चालकको खोजी भइरहेको छ ।
प्रहरीले घटनामा संलग्न सवारीसाधन तथा चालकको पहिचान गरी आवश्यक अनुसन्धान अघि बढाइरहेको जनाएको छ ।