वीरगंज । वीरगंजस्थित नेशनल मेडिकल कलेजमा सुरक्षागार्डले बिरामीका आफन्तसँग दुर्व्यवहार गरेको आरोप लागेको छ । कलैया उपमहानगरपालिका–८ की बिरामी कलिजा खातुनको कुरुवा बसेका आफन्तलाई बुधवार बिहान भेट गर्न रोक लगाइएपछि विवाद भएको हो ।
हात भाँचिएर १५ दिनदेखि उपचाररत खातुनलाई भेट्न खोज्दा सुरक्षा गार्डले दुर्व्यवहार गरेको आफन्तको गुनासो छ। उनीहरूका अनुसार गार्डहरूले भेट्न नदिएर जबरजस्ती बाहिर निकाल्ने प्रयास गरेपछि विवाद चर्किएको हो ।
विवादको भिडियो समेत सार्वजनिक भएको छ। तर, नेशनल मेडिकल कलेजका प्रशासन प्रमुख गौशुल आजमले भने सुरक्षा गार्डले दुर्व्यवहार नगरेको दाबी गरेका छन् । उनका अनुसार कुरुवाहरूले अस्पतालको बाटो अबरुद्ध बनाउने र राति पनि वार्डमै सुत्न खोज्ने भएकाले हटाइएको हो ।
घटनाको जानकारी पाएपछि आफैं पुगेको भन्दै आजमले दुर्व्यवहारको पुष्टि नभएको दाबी गरेका छन्। तर पीडित पक्षले कलेज प्रशासनबाट निष्पक्ष छानबिनको माग गरेका छन् ।
