नेपाल र भारतबीच अन्तरदेशीय अपराध नियन्त्रण, शान्ति सुरक्षा कायम र सीमा क्षेत्रका आपराधिक गतिविधि न्यूनीकरणका लागि दुई देशका सुरक्षा अधिकारीहरूले आवश्यक समन्वय र सहकार्य गरेर अघि बढ्ने प्रतिबद्धता जनाएका छन् ।
सोमबार वीरगन्जमा सम्पन्न नेपाल–भारत सिमाना जिल्ला समन्वय समितिको बैठकमा दुवै देशका सुरक्षा अधिकारीहरू सहभागी थिए । बैठकमा अन्तरदेशीय अपराध नियन्त्रण, सूचना आदानप्रदान, अवैध कारोबार नियन्त्रण तथा सीमा क्षेत्रमा शान्ति सुरक्षा सुदृढ गर्ने विषयमा गहिरो छलफल भएको थियो ।
बैठकमा भारतीय पक्षले बिहार राज्यमा हुन लागेको विधानसभाको आसन्न निर्वाचनका सन्दर्भमा सीमा सुरक्षाबारे अपेक्षा राखेको र नेपाली पक्षले त्यसमा आवश्यक सहयोग गर्ने प्रतिबद्धता जनाएको थियो ।
कोभिड महामारीबाट उत्पन्न हुन सक्ने सम्भावित जोखिम तथा त्यसमा दुवै देशबीच अपनाउनुपर्ने सावधानी र सतर्कता, सीमा क्षेत्रमा फैलिरहेको नक्कली मुद्राको कारोबार, मानव बेचबिखन नियन्त्रण, विपद्को बेला उद्धार र मानवीय सहयोगका विषयमा पनि छलफल भएको थियो ।
त्यसैगरी, सीमा क्षेत्रमा हुने अवैध चोरी–निकासी तथा पैठारी रोक्नका लागि दुबै देशका भन्सार, वन तथा सुरक्षा निकायबीच समन्वय गर्नुपर्नेमा सहमति भएको छ । सिर्सिया नदी प्रदूषण नियन्त्रण, अवैध व्यापार रोकथाम, आपतकालीन उद्धार संयन्त्र निर्माणजस्ता विषयहरू बैठकको मुख्य एजेन्डा रहेका थिए ।
बैठकमा नेपाली पक्षबाट पर्साका प्रमुख जिल्ला अधिकारी गणेश अर्याल, बाराका प्रजिअ वसन्त अधिकारी, नेपाल प्रहरी र सशस्त्र प्रहरीका प्रमुखहरू सहभागी थिए । भारतीय पक्षबाट बिहार पूर्वी चम्पारणका डिस्ट्रिक्ट मजिस्ट्रेट सौरभ जौरवाल, पश्चिम चम्पारणका डेपुटी डेभलपमेन्ट कमिसनर सुमित कुमार तथा एसएसबी अधिकारीहरूको उपस्थिति थियो ।
