नेपाली कांग्रेसकी केन्द्रीय सदस्य प्रतिमा गौतमले पार्टीभित्रैका केही नेताहरुको गैरजिम्मेवारीपूर्ण व्यवहारले कांग्रेस कमजोर बन्दै गएको आरोप लगाएकी छन् ।
कांग्रेसको केन्द्रीय समितिको बैठकमा बोल्दै गौतमले पार्टीमा आत्ममूल्यांकन नगरी दोषारोपण गर्ने प्रवृत्ति मौलाएको बताइन् । “कसैले कसैलाई दोषारोपण गरेर यो बैठकको औचित्य रहन्छ जस्तो मलाई लाग्दैन,” गौतमले भनिन्, “आफूले गरेको कामको जिम्मेवारी आफैले लिनुपर्छ ।”
उनले केन्द्रदेखि स्थानीय तहसम्म नेताहरुले जिम्मेवारीपूर्ण भूमिका नखेले पार्टी बलियो बन्न नसक्ने धारणा व्यक्त गरिन् । पार्टीभित्रैका केही नेताहरुले सामाजिक सञ्जालमा कांग्रेसलाई कमजोर बनाउने खालका अभिव्यक्ति दिइरहेको गुनासो समेत गरिन् ।
“त्यसरी लेख्दा कांग्रेसलाई कहाँ पुर्याउँछ? आफ्नै पार्टीलाई खुल्याउँदै संगठन बन्छ त?” गौतमले प्रश्न गरिन् । उनले अन्य दलबाट कांग्रेसमाथि आक्रमण भइरहेको बेला भित्रबाटै पार्टी कमजोर बनाउने प्रयास अस्वीकार्य रहेको स्पष्ट पारिन् ।
