सीमा सुरक्षा, प्रविधिमैत्री व्यवस्थापन तथा द्विपक्षीय सहकार्यलाई थप सुदृढ बनाउने प्रतिबद्धतासहित नेपाल–भारत १०औँ समन्वय बैठक सम्पन्न भएको छ ।
सशस्त्र प्रहरी महानिरीक्षक नारायणदत्त पौडेल र भारतको सशस्त्र सीमा बल (एसएसबी) का महानिर्देशक सञ्जय सिंघलको नेतृत्वमा सशस्त्र प्रहरी बल नेपाल र एसएसबी भारतबीच काठमाडौंमा बैठक सम्पन्न भएको हो ।
बैठकमा अघिल्लो ९औँ समन्वय बैठकका निर्णयहरूको प्रगति समीक्षा गर्दै सीमा क्षेत्रमा हुने अवैध गतिविधि तथा सीमापार अपराध नियन्त्रणका लागि रणनीतिक, अपरेसनल र कार्यक्षेत्र तहमा सहकार्य बढाउने सहमति भएको छ । साथै, शीघ्र सूचना आदानप्रदानलाई प्रभावकारी बनाउने विषयमा दुवै देशका सुरक्षा नेतृत्वले प्रतिबद्धता व्यक्त गरेका छन् ।
बैठकमा नेपालका तर्फबाट सशस्त्र प्रहरी बलका उच्च अधिकारी, परराष्ट्र तथा गृह मन्त्रालय, नापी विभाग, नेपाल प्रहरी र राष्ट्रिय अनुसन्धान विभागका प्रतिनिधिको सहभागिता थियो । भारतका तर्फबाट एसएसबीका उच्च अधिकारी, काठमाडौंस्थित भारतीय दूतावास तथा विदेश र गृह मन्त्रालयका प्रतिनिधि सहभागी थिए ।
बैठकमा नेपाल–भारत सीमा क्षेत्रको समग्र सुरक्षा अवस्था शान्तिपूर्ण कायम राख्न दुवै देशका सुरक्षा निकायले प्रदर्शन गरेको व्यावसायिकता र सहकार्यको प्रशंसा गरिएको थियो । सामाजिक सञ्जालको दुरुपयोग तथा भ्रामक सूचनाबाट उत्पन्न सुरक्षा चुनौती र सामाजिक सद्भावमा पर्न सक्ने असरलाई सम्बोधन गर्न संस्थागत सहकार्य सुदृढ बनाउने सहमति पनि भएको छ ।
त्यस्तै, दशगजा क्षेत्रको प्रभावकारी व्यवस्थापनका लागि अनधिकृत खेतीपाती, अतिक्रमण तथा अवैध संरचना हटाउन संयुक्त प्रयासलाई निरन्तरता दिने निर्णय भएको छ । बाउन्ड्री वर्किङ ग्रुप (बीडब्लूजी) र सर्भे अफिसियल्स कमिटी (एसओसी) का निर्णयअनुसार सीमा स्तम्भको मर्मत, सम्भार तथा पुनर्निर्माणका लागि फिल्ड तहमा समन्वय बढाउने सहमति भएको छ ।
सीमापार आपराधिक सञ्जाल, अवैध तस्करी, मानव बेचबिखन, नक्कली नोट तथा लागुऔषध नियन्त्रणका साथै तेस्रो मुलुकका नागरिकको अनधिकृत आवतजावत रोक्न सूचना आदानप्रदानलाई निरन्तरता दिने प्रतिबद्धता पनि व्यक्त गरिएको छ ।
खुला सीमाको दुरुपयोग गरी तेस्रो मुलुकका नागरिकको अवैध प्रवेश रोक्न सीमा नाकामा जाँच तथा कागजात प्रमाणीकरण कडा बनाउने, दशगजा क्षेत्रमा समन्वयात्मक गस्ती सञ्चालन गर्ने र शङ्कास्पद व्यक्तिबारे तत्काल सूचना आदानप्रदान गर्ने सहमति भएको छ ।
सीमा सुरक्षालाई आधुनिक र प्रविधिमैत्री बनाउन दशगजा क्षेत्रमा सीसीटीभी जडान, प्रमुख सीमा नाकामा लगेज स्क्यानर तथा वाक–थ्रु मेटल डिटेक्टर राख्ने र दुवै देशले आ–आफ्नो भूभागमा ड्रोनको प्रयोग बढाउने विषयमा पनि छलफल भएको छ । सीमा सुरक्षा चुनौती सामना गर्न आधुनिक प्रविधि र विशेष तालिममा सहयोग विस्तार गर्ने तथा नियमित अध्ययन भ्रमणमार्फत दुवै सुरक्षा निकायबीच संस्थागत सम्बन्ध थप प्रगाढ बनाउने निर्णय गरिएको सशस्त्र प्रहरी बलका प्रवक्ता डीआईजी नेत्रबहादुर कार्कीले जानकारी दिएका छन् ।
यसैगरी, बाढी, पहिरो र भूकम्पजस्ता प्राकृतिक विपद्को समयमा संयुक्त रूपमा उद्धार कार्य सञ्चालन गर्न चितवनको कुरिनटारस्थित सशस्त्र प्रहरी बलको विपद् व्यवस्थापन तालिम शिक्षालयमा संयुक्त शीघ्र जल उद्धार अभ्यास सञ्चालन गर्ने विषयमा छलफल भएको छ ।
वैधानिक यात्रुलाई सहजता प्रदान गर्न सीमा नाकामा सहायता कक्ष (हेल्प डेस्क) विस्तार गर्ने तथा मैत्रीपूर्ण खेलकुद, अन्तर्राष्ट्रिय दिवस र प्रमुख चाडपर्वका अवसरमा संयुक्त सांस्कृतिक कार्यक्रम आयोजना गरी द्विपक्षीय विश्वास र सद्भाव अभिवृद्धि गर्ने सहमति पनि भएको छ ।
सन् २०१२ देखि पालैपालो नेपाल र भारतमा आयोजना हुँदै आएको नेपाल–भारत द्विपक्षीय समन्वय बैठकको ११औँ संस्करण आगामी वर्ष भारतमा आयोजना गरिनेछ ।
