जनता समाजवादी पार्टी (जसपा) का नेता तथा पूर्वसांसद अशोक यादवले ‘मधेश कुनै न कुनै दिन नेपालबाट अलग हुनेछ’ भन्ने विवादास्पद अभिव्यक्ति दिएका छन् । अदालतबाट पक्राउ पुर्जी जारी भएपछि फरार रहेका यादवले सामाजिक सञ्जालमा एक भिडियो सन्देश सार्वजनिक गर्दै यस्तो अभिव्यक्ति दिएका हुन् ।
“जय बिहार, जय नेपाल, जय भारत” भनाइबाट भिडियो सुरु गरेका यादवले आफू मधेशको स्वाभिमान र अधिकारका लागि लडिरहेको दाबी गर्दै भने, “म रहूँ वा नरहूँ, मधेश एकदिन नेपालबाट अलग हुनेछ ।”नेपाल प्रहरीको खोजी सूचीमा रहेका यादवले आफूलाई पक्राउ गर्न नदिन भारतको सीतामढीका एसपी र अन्य प्रहरी अधिकारीसँग आग्रहसमेत गरेका छन्। उनले भने, “नेपालका एसपीले भनेको आधारमा कुनै पनि कदम नउठाउनु ।”
नेपाल सरकारप्रति गम्भीर आरोप
भिडियो सन्देशमा यादवले नेपाली शासकवर्गमाथि मधेसी समुदायलाई दोस्रो दर्जाको नागरिकको रूपमा व्यवहार गर्ने नश्लीय सोच राखेको आरोप लगाए। उनले भने, “यो नस्लवादी चिन्तनको अन्त्य अब हुनैपर्छ। हाम्रो नयाँ पुस्ताले विद्रोह गर्नेछ । सीके राउतजीले उठाएको ‘स्वराज’को विचार सही थियो। ”
सर्लाही प्रहरीविरुद्ध गम्भीर आरोप
यादवले सर्लाहीका एसपी योगेन्द्रकुमार खड्का र डीएसपीमाथि ‘गुण्डागर्दी’ गरेको आरोप पनि लगाए। उक्त आरोपसँगै उनको अडियो क्लिप सार्वजनिक भएपछि उनी प्रहरीको निगरानीमा आएका थिए । अहिले उनी भारततर्फ फरार भइसकेको प्रहरी स्रोतले जनाएको छ ।
मधेस प्रदेश प्रहरी प्रमुख डीआईजी उमाप्रसाद चतुर्वेदीका अनुसार अदालतबाट पक्राउ पुर्जी जारी भएपछि यादवको खोजी तीव्र पारिएको छ । प्रहरीले अन्तरदेशीय समन्वयमार्फत उनको खोजी गरिरहेको जनाएको छ ।
