वीरगंज | कानुन, न्याय तथा संसदीय मामिलामन्त्री अजय चौरसियाले नेपाल र भारतबीचका सम्बन्धमा असर नपर्ने गरी पत्रकारिता गर्न दुवै देशका पत्रकारहरूसँग आग्रह गर्नुभएको छ ।
शनिबार वीरगन्जमा मिडिया फर बोर्डर हार्मोनीले आयोजना गरेको “नेपाल–भारत सीमापार मिडिया सम्मेलन” मा सम्बोधन गर्दै मन्त्री चौरसियाले दुई देशबीचको आपसी सम्बन्ध विश्वमै अनुपम रहेको बताए । उहाँले सीमा क्षेत्रका सांस्कृतिक, सामाजिक, धार्मिक र आर्थिक समस्याहरू साझा समस्याको रूपमा रहेकोले यसको समाधान दुवै मुलुकको समन्वय र सहकार्यबाट हुनुपर्नेमा जोड दिनुभयो ।
“नेपाल र भारतबीच देखिएका केही समस्या साझा समस्याका रूपमा रहेका छन्, जसको समाधान दुवै मुलुकको सामूहिक प्रयासबाट मात्रै सम्भव छ,” मन्त्री चौरसियाले भन्नुभयो ।
उहाँले दुई देशबीचको सम्बन्ध केवल सरकारबीच मात्र नभई नागरिकस्तरमा पनि प्रगाढ रहेको बताउँदै भने, “नेपाल र भारतबीच राजनीतिक सम्बन्ध अझ प्रगाढ हुनुमा दुई देशका नेताहरू र नागरिकहरूको ऐतिहासिक योगदान छ । भारतमा स्वतन्त्रताका लागि भएको आन्दोलनमा नेपालका नेताहरूको सहभागिता र नेपालमा लोकतन्त्रका लागि भएको आन्दोलनमा भारतीय नेताहरूको योगदानको स्मरण गराउँछु ।”
मधेस प्रदेशका प्रदेशसभा सदस्य श्याम पटेलले सत्य तथ्यमा आधारित समाचारले मात्रै दुई मुलुकको सम्बन्ध प्रगाढ हुने उल्लेख गर्दै, पत्रकारहरूले समाचार सम्प्रेषण गर्दा दुवै मुलुकको हितलाई ध्यानमा राख्नुपर्ने र अतिरञ्जना फैलाउने खालका समाचारबाट टाढा रहन आग्रह गर्नुभयो ।
सम्मेलनको उद्घाटन सत्र मिडिया फर बोर्डर हार्मोनी नेपालका अध्यक्ष अनिल तिवारी र कानुन मन्त्री अजय चौरसियाको अध्यक्षतामा सम्पन्न भएको थियो । यसमा पूर्वराजदूत विजयकान्त कर्ण, नेपाल पत्रकार महासंघका केन्द्रीय सचिव अशोक तिवारी, वरिष्ठ पत्रकार हस्त बहादुर गुरुङ, भारतबाट बोर्डर फर हार्मोनीका अध्यक्ष अमरेन्द्र तिवारी लगायतले दुई देशबीचको सम्बन्ध र सञ्चार क्षेत्रमा देखिएका चुनौतीहरूबारे छलफल गर्नुभयो ।
सम्मेलनमा नेपालका विभिन्न जिल्लाबाट ४० र भारतका विभिन्न प्रान्तबाट ५० जना पत्रकारहरूको सहभागिता रहेको थियो ।
भिडियाे सामाग्री
