साउदी अरबमा वैदेशिक रोजगारीका क्रममा आफ्नै दुई नेपाली साथीको हत्या गरेको अभियोगमा कास्कीका ४५ वर्षीय पुष्पराज रानाभाटलाई मृत्युदण्ड कार्यान्वयन गरिएको छ।
महोत्तरीका ५० वर्षीय भाग्यनारायण राय र ४४ वर्षीय सरोजकुमार झाको २०८० असोज २ गते हत्या गरेको ठहरपछि साउदी अरबको दमामस्थित तल्लो अदालतले रानाभाटलाई मृत्युदण्डको सजाय सुनाएको थियो। तल्लो अदालतको निर्णयलाई उच्च अदालत र सर्वोच्च अदालतले समेत सदर गरेपछि जेल प्रशासनले मृत्युदण्ड कार्यान्वयन गरेको जनाएको छ।
घटनाबारे विस्तृत विवरण सार्वजनिक नभए पनि परराष्ट्र मन्त्रालयका एक अधिकारीले आपसी विवादकै कारण हत्या भएको हुनसक्ने बताएका छन्। पीडित परिवार र अभियुक्तबीच ‘ब्लडमनि’ (रक्तपैसा) सम्बन्धी पहल नभएको तथा पीडित परिवार यसबारे अनभिज्ञ रहेको जनाइएको छ।
साउदी अरबमा मृत्युदण्ड कार्यान्वयन गर्नु अघि अन्तिम इच्छा सोध्ने परम्परा रहिआएको छ। साउदी सरकारले नेपाली दूतावासलाई पठाएको पत्रमा रानाभाटले पोखरास्थित सम्पत्ति श्रीमती र छोरालाई दिन चाहेको बताएका थिए।
तर, मृत्युदण्ड कार्यान्वयन भइसकेपछि मात्र ढिला गरी दूतावासलाई जानकारी गराइएको साउदीका लागि नेपाली राजदूत नरेश विक्रम ढकालले बताएका छन्। त्यहाँ मृत्युदण्ड पाएकाको शव परिवारजनलाई उपलब्ध गराउने प्रचलन नभएको पनि प्रष्टाइएको छ।
यसअघि पनि उदयपुरका विवेक दाहाल, पर्वतका सन्तबहादुर पुनलगायत नेपालीले साउदी अरबमा मृत्युदण्ड भोगिसकेका छन्। दाहाललाई २०७९ कार्तिक ६ गते मृत्युदण्ड दिइएको थियो भने पुनलाई २२ वर्ष लामो जेल जीवनपछि मृत्युदण्ड दिइएको थियो।
सन् २०१७ मा युवराज बनेका मोहम्मद बिन सलमान (एमबीएस) ले मृत्युदण्ड सम्बन्धी कानुनमा सुधार गर्ने घोषणा गरे पनि हत्यासम्बन्धी मुद्दामा भने मृत्युदण्ड कार्यान्वयन भइरहेकै छ। खाडी मुलुकमा अझै पनि मृत्युदण्डको प्रचलन उच्च रहेको मानिन्छ।
