रौतहटमा चिनी तस्करी प्रकरणमा सशस्त्र प्रहरीका एसपी र डिएसपीमाथि कारबाही प्रक्रिया अघि बढिरहेका बेला मोरङमा पनि तस्करी मौलाएको भन्दै गृहमन्त्रालय र सशस्त्र प्रहरी मुख्यालयमा गम्भीर उजुरी परेको छ ।
भारतसँग सीमा जोडिएको मोरङ जिल्लामा कपडा अवैध चोरी–पैठारी तथा हुण्डीको कारोबार सशस्त्र प्रहरीको मिलेमतोमा चलिरहेको उजुरी परेको हो ।
हालै राजश्व अनुसन्धान विभागले विराटनगर–११ स्थित स्वस्तिका ट्रेड एण्ड सप्लायर्समा छापा मारेर करोडौँ मूल्यबराबरको कपडा बरामद गरेको थियो । उक्त कारबाहीपछि मोरङ जिल्लास्थित सशस्त्र प्रहरी प्रमुख एसपी राजेश घिमिरेमाथि निगरानी कमजोर भएको वा मिलेमतो रहेको प्रश्न उठेको छ ।
राजश्व विभागका अनुसार सो गोदाममा भन्सारमा देखाएको भन्दा बढी परिमाणमा कपडा आयात गरी स्टोर गरिएको थियो। विभागले सबै गोदाम सिल गरेर महँगा सटिङ–सुटिङ कपडासहित विभिन्न थरीका सामान नियन्त्रणमा लिएको छ ।
स्रोतका अनुसार मोरङसहित कोशी प्रदेशका सीमा नाकाहरू – रंगेली, डुमरिया र सिजुवाबाट दैनिक करोडौँको राजश्व छली हुने गरी तस्करी भइरहेको छ। यी नाकाहरूबाट चिनी, हार्डवेयर, किराना, कपडा, खाद्यान्न, रक्सी, गिट्टी–बालुवा लगायतका सामान भारतबाट अवैध रूपमा भित्रिने गरेको छ ।
मोरङमा हुण्डी, सट्टेबाजी, जुवा, सुनचाँदी र अन्य अवैध कारोबार पनि फस्टाएको बताइएको छ । भारतसँग ६३ दशमलव ४ किलोमिटर खुला सिमाना रहेको कारण पनि यहाँ तस्करी बढी हुने गरेको हो ।
सशस्त्र प्रहरीले सीमा अतिक्रमण, अन्तर्राष्ट्रिय आतंकवादी गतिविधि, अवैध हतियार तथा विष्फोटक पदार्थको ओसारपसार नियन्त्रणलाई प्राथमिकता दिनुपर्नेमा तस्करीलाई छाड दिएपछि राष्ट्रिय सुरक्षामै असर पर्ने भन्दै गृहमन्त्रालयले गम्भीर चासो देखाएको छ ।
गृहमन्त्रालयका एक अधिकारीले भने, “मोरङको उजुरीलाई हामीले गम्भीर चासो राखेका छौं । सशस्त्रले लागुऔषध, जडीबुटी, वन पैदावार, मानव बेचबिखनजस्ता अन्तरदेशीय अपराध नियन्त्रणमा महत्वपूर्ण भूमिका खेल्नुपर्ने हो, तर तस्करी बढ्दै जानु चिन्ताजनक छ ।”
भिडियाे सामाग्री
