महोत्तरी | बर्दीबास नगरपालिका–११, खैरमारास्थित निर्मल लामा बहुप्राविधिक शिक्षालयका शिक्षक वसन्तप्रसाद यादवलाई छात्रामाथि दुर्व्यवहार गरेको आरोपमा प्रहरीले पक्राउ गरेको छ ।
इलाका प्रहरी कार्यालय बर्दीबासका अनुसार यादवले शिक्षालयमा अध्ययनरत चार छात्रामाथि दुर्व्यवहार गरेको अभियोगमा पक्राउ गरी अभद्र व्यवहार मुद्दा दर्ता गरिएको छ । अभिभावकसहित आएका छात्राले दिएको जाहेरीका आधारमा प्रहरीले उनलाई नियन्त्रणमा लिएको हो ।
शिक्षक यादवले रातको समयमा फोन गरेर कहिले परीक्षामा पास गरिदिने प्रलोभन देखाउने त कहिले अभद्र धाकधम्की दिई मानसिक यातना दिने गरेको उजुरी परेको प्रहरीले जनाएको छ । यससम्बन्धी अडियो रेकर्डसमेत फेला परेको छ।
शिक्षालयका प्रमुख रमण मेहताले घटना सार्वजनिक भएपछि तुरुन्तै सीटीईभीटी मधेश प्रदेशका निर्देशक अच्युतराज दहाललाई जानकारी गराई प्रमुख जिल्ला अधिकारीसँग परामर्शपछि पीडित छात्रालाई अभिभावकसहित प्रहरीमा पठाइएको बताए ।
मेहताले भने, “घटनाबाट हामी स्तब्ध भएका छौँ। शिक्षालयको मर्यादा कायम राख्न र यस्ता घटना दोहोरिन नदिन सजग हुनेछौँ ।”
२०७७ सालदेखि करारमा कार्यरत यादव महोत्तरीको सोनमा गाउँपालिका स्थायी बसोबास गर्दै आएका छन् । यसअघि सोही शिक्षालयका तीन छात्राले एकसाथ विष सेवन गरेको घटनामा पनि उनको संलग्नता रहे–नरहेकोबारे अनुसन्धान भइरहेको प्रहरीले जनाएको छ। २०८१ पुस १५ गतेको उक्त घटनामा एक छात्रा मृत फेला परेकी थिइन् ।
पक्राउ परेका यादवलाई जिल्ला प्रहरी कार्यालय महोत्तरीले न्यायिक हिरासतमा राखेर अनुसन्धान अगाडि बढाइरहेको छ । जिल्ला अदालतले बिहीबार उनलाई सात दिन थुनामा राख्न अनुमति दिएको जिल्ला प्रहरी कार्यालयका डिएसपी तथा सूचना अधिकारी शैलेन्द्र भट्टले जानकारी दिए ।
भिडियाे सामाग्री
