सर्लाही । जेनजीको आन्दोलनका क्रममा भएको आगजनी र तोडफोडले सर्लाहीका आधा दर्जन पालिकामा प्रशासनिक सेवा अनिश्चित बनेको छ । लालबन्दी, हरिवन, बागमती, बरहथवा, हरिपुर, हरिपूर्वा, ईश्वरपुर नगरपालिकासहित चन्द्रनगर गाउँपालिकामा कार्यालय सञ्चालनमा समस्या देखिएको छ ।
लालबन्दी नगरपालिकाका प्रमुख प्रशासकीय अधिकृत वसन्त न्यौपानेका अनुसार, आगजनी र तोडफोडबाट कार्यालयका कागजात, कम्प्युटरसहितका विद्युतीय उपकरण, फर्निचरलगायत सबै सरसामग्री खरानी भएका छन्। यस कारण तत्काल सेवा दिन सम्भव नभएको उनले बताउनुभयो ।
प्रदर्शनकारीले लालबन्दीमा नगरप्रमुखले चढ्ने प्राडो, उपप्रमुखको टाटासुमो, प्रमुख प्रशासकीय अधिकृतको स्कार्पियोसहित एउटा जेसिबी, डोजर, ट्रक र ट्याक्टर क्षतिग्रस्त बनाएका छन् । साथै, वडा नं. ५, ६, ७ र ९ का वडा कार्यालयमा पनि आगजनी र तोडफोड भएको नगरपालिका कार्यालयले जनाएको छ ।
हरिवन नगरपालिकामा पनि आगजनीले दमकल जलाएको छ । नगरप्रमुख रमेश बुढाथोकीका अनुसार निर्माणाधीन भवनसहित सरसामग्री, कागजात, दमकल र ट्याक्टर ध्वस्त भएका छन् । वडा नं. ४, ८, १० र ११ का वडा कार्यालय पनि खण्डहर बनेका छन् ।
हरिपुर नगरपालिकाले पनि नगरपालिका भवन, प्रमुख प्रशासकीय अधिकृतको गाडी, तीनवटा मोटरसाइकल र कार्यालयभित्रका सबै कागजात जलेको बताउँदै तत्काल सेवा दिन नसक्ने जनाएको छ । नगरप्रमुख गोपाल पजियारले क्षतिको विवरण सङ्कलन भइरहेको हुँदा सेवा सुचारु हुन केही दिन लाग्ने जानकारी दिनुभयो ।
बरहथवा नगरपालिकामा सबैभन्दा बढी सवारी साधन, भवन र कागजात जलेका छन् । प्रमुख प्रशासकीय अधिकृत ऋद्धिप्रकाश सिटौलाका अनुसार आगजनीबाट प्रशासनिक भवन, वडा नं. ५, ६ र ७ का कार्यालय, एक ग्रेडर, ट्याक्टर, ब्याकहु लोडर, टिप्पर, १३ मोटरसाइकल, तीन स्कुटर र रोलर नष्ट भएका छन् ।
चन्द्रनगर गाउँपालिकाका अध्यक्ष राजकुमार महतोले कार्यालयका सबै आवश्यक सामग्री जलेको हुँदा सेवा दिन गाह्रो भएको बताउनुभयो । उहाँले प्रदर्शनकारीले जेनजीको नाममा अराजक गतिविधि गर्दै कार्यालयमा आगजनी गरेको पनि जानकारी दिनुभयो ।
आगजनी र तोडफोडका कारण पालिकामा उपलब्ध सेवा ठप्प भएका छन्। वडा कार्यालयमा आगजनी हुँदा व्यक्तिगत घटना दर्ता लगायत अन्य प्रशासनिक काम पनि प्रभावित भएका छन् ।
यता, जिल्लाका अन्य पालिका र सरकारी कार्यालय तथा निकायले आइतबारदेखि सेवा सुचारु गरेका छन्। प्रदर्शनकारीले सरकारी कार्यालय र सवारी साधनमा पनि क्षति पुर्याएका थिए।
जिल्ला प्रहरी कार्यालय सर्लाहीका प्रवक्ता सरोज राईले आगजनी र तोडफोडबाट भएको क्षतिको विवरण सङ्कलन भइरहेको जानकारी दिनुभयो।
अवस्था सामान्य बनेपछि सर्लाहीमा यातायात, विद्यालय र हाटबजार भने निरन्तर सञ्चालनमा आएका छन्।
