नेपाल राष्ट्र बैंकले आज (बुधबार) पनि वित्तीय प्रणालीबाट ४० अर्ब रुपैयाँ झिक्ने भएको छ । बैंक तथा वित्तीय संस्थामा ऋण दिन मिल्ने रकम (तरलता) बढिरहेको अवस्थालाई व्यवस्थापन गर्न राष्ट्र बैंकले निक्षेप संकलन उपकरणमार्फत ४ दिनका लागि उक्त रकम संकलन गर्न लागेको हो ।
राष्ट्र बैंकले आज दिउँसो ३ बजेसम्म अनलाइन बोलकबोल प्रक्रियामार्फत रकम संकलन गर्न बैंक तथा वित्तीय संस्थालाई आह्वान गरेको छ । यसअन्तर्गत घटिमा १० करोड रुपैयाँ र बढीमा ५ करोड रुपैयाँले भाग गर्दा निःशेष भाग जाने गरी बोलकबोल गर्न सकिने उल्लेख गरिएको छ ।
निक्षेप संकलन उपकरणको बोलकबोलमा ‘क’, ‘ख’ र ‘ग’ वर्गका बैंक तथा वित्तीय संस्था मात्र सहभागी हुन पाउने छन् । खरिद गरिएको निक्षेप संकलन उपकरण अन्य बैंक तथा वित्तीय संस्थामा धितोका रूपमा प्रयोग गर्न सकिने व्यवस्था गरिएको छ ।
राष्ट्र बैंकले निक्षेप संकलन उपकरणको बोलकबोल ब्याजदरमा गर्नुपर्ने र बहुब्याजदरमा समेत बहुबोलकबोल गर्न सकिने व्यवस्था रहेको जनाएको छ ।
