जनकपुरधाम | मधेस प्रदेशका मुख्यमन्त्री जितेन्द्र सोनलले शनिबार प्रदेश सभाबाट विश्वासको मत लिने कार्यक्रम तय गरिएको थियो । तर, मतदान अघि नै राजनीतिक समीकरण उल्टिएपछि उहाँले राजीनामा घोषणा गर्नुभएको छ ।
विश्वासको मतको क्रममा जनमत पार्टीका प्रदेश सभा सदस्य सतिशकुमार सिंह र त्रिभुवन साह बैठकमै अनुपस्थित रहे । उनीहरूको अनुपस्थितिले मुख्यमन्त्री सोनलका लागि संकट थपियो । यद्यपि सत्ता गठबन्धनका सबै सांसद उपस्थित भई समर्थन जनाए पनि माओवादी केन्द्रका प्रदेश सभा सदस्य रहबर अन्सारी र माला कर्णले पार्टी ह्विप विपरीत विश्वासको मत नदिने घोषणा गरेपछि परिस्थिती पल्टियो ।
सभामुख रामचन्द्र मण्डलसँग केही समयका लागि बैठक स्थगित गर्न आग्रह गरेपछि १० मिनेटका लागि स्थगित गरिएको बैठक एक घण्टापछि पुनः सुरु भयो । त्यसपछि मुख्यमन्त्री सोनलले विश्वासको मत लिने परिस्थिति अनुकूल नरहेको भन्दै सदनमै राजीनामाको घोषणा गर्नुभयो ।
माओवादीभित्रको असन्तुष्टिले निम्त्यायो संकट
मुख्यमन्त्री सोनलको सरकार ढल्नमा माओवादी केन्द्रका दुई सांसद रहबर अन्सारी र माला कर्णको भूमिका निर्णायक बन्यो । उनीहरूको विद्रोहको कारण विश्वासको मत होइन, पार्टीभित्रको आन्तरिक किचलो रहेको बताइएको छ ।
रहबर र माला दुवैले पार्टी अध्यक्ष पुष्पकमल दाहाल ‘प्रचण्ड’को प्रत्यक्ष हस्तक्षेपको विरोध गर्दै मधेस प्रदेशमा पार्टीभित्र लोकतान्त्रिक अभ्यास कमजोर भएको आरोप लगाए । रहबरले रोष्टममै पुगेर “जनताले कालोमोसो दल्नु अघि म आफैं अनुहारमा कालोमोसो दल्छु” भन्दै आफ्नो अनुहारमा कालोमोसो दल्दै विद्रोहको संकेत गरे । उनलाई माला कर्णले समर्थन जनाइन् ।
यी दुई सांसद भरत साहलाई माओवादी केन्द्रको संसदीय दलको नेता बनाइएकोमा असन्तुष्ट थिए । पार्टीभित्रको नेतृत्व विवादकै रिस उनीहरूले सदनमा पोख्दा सोनल नेतृत्वको सरकार ढलेको विश्लेषण गरिएको छ ।
सभामुखको भूमिकामाथि उठे प्रश्न
शनिबारको घटनापछि सभामुख रामचन्द्र मण्डलको भूमिकामाथि पनि प्रश्न उठेको छ । विश्वासको मतका लागि भएको बैठकमा दलका नेताहरूले आफ्नो धारणा राखेपछि मत विभाजनको तयारी भइरहेकै बेला माओवादी सांसद रहबर अन्सारीले बोल्न समय मागे । सभामुखले उनलाई रोष्टम प्रयोग गर्न दिएपछि विवाद सुरु भयो ।
माओवादी केन्द्रका संसदीय दलका नेता भरत साहले सभामुख मण्डलमाथि संसदीय मर्यादा विपरीत सदन सञ्चालन गरेको आरोप लगाए । उनले कार्यव्यवस्था परामर्श समितिको निर्णयअनुसार बैठक सञ्चालन हुनुपर्नेमा सभामुखले एकलौटी निर्णय गरेको बताए ।
साहले भने, “तपाईं सभामुखको हैसियतमा तटस्थ रहनुपर्ने हो, तर दलीय झुकावका साथ सदन सञ्चालन गर्नुभयो।”
मुख्यमन्त्री सोनलले पनि सभामुखमाथि असन्तुष्टि जनाउँदै सरकारको प्रतिनिधि अनुपस्थित हुँदा समेत एकलौटी रूपमा बैठक सञ्चालन गरिएको आरोप लगाउनुभयो ।
मधेसमा राजनीतिक अस्थिरता थपिने अनुमान
मुख्यमन्त्री सोनलको राजीनामासँगै मधेस प्रदेशमा पुनः सत्ता समीकरण बन्ने सम्भावना बढेको छ । नयाँ गठबन्धन निर्माण वा वैकल्पिक नेतृत्व चयनका विषयमा राजनीतिक दलबीच छलफल सुरु भएको जनाइएको छ ।
