काठमाडौं महानगरपालिकाका मेयर बालेन्द्र शाह (बालेन) निकट समूहले नयाँ राजनीतिक दल दर्ता गर्ने तयारी थालेका छन् ।
उनका सचिवालय सदस्यहरूकै पहलमा ‘देश विकास पार्टी’ नामक दल दर्ता गर्ने प्रक्रिया अघि बढाइएको बुझिएको छ । मेयर शाहका नजिकका एक सदस्यका अनुसार, सुरुमा ऊर्जा मन्त्री कुलमान घिसिङसँग सहकार्य गरी ‘उज्यालो नेपाल’ नामक दल खोल्ने तयारी गरिएको थियो ।
तर, पार्टी गठनको प्रक्रिया, नाम र नीतिगत विषयमा मतभेद देखिएपछि बालेन समूहले छुट्टै दल खोल्ने तयारी गरेको हो।
“कुलमान घिसिङको टोलीमा हाम्रो केही सदस्यहरू पठाइएका थिए। तर पार्टीको नाम, पारदर्शिता र नेतृत्वको विषयमा कुरा नमिलेपछि हामी ब्याक भएका हौं,” बालेन निकट एक सदस्यले बताए। उनका अनुसार कुलमानले एकल निर्णय लिने शैली देखाएपछि सहमति कार्यान्वयन हुन सकेन।
स्रोतका अनुसार, अब ‘देश विकास पार्टी’ नामक नयाँ दल बालेन समूहकै पहलमा दर्ता हुँदैछ ।
- बालेन शाहको सचिवालयद्वारा ‘देश विकास पार्टी’ दर्ता तयारी
- संयोजक सुदीप ढकाल, प्रस्तावित चिन्ह ‘लौरो’
- कुलमान घिसिङसँगको सहकार्य असफल भएपछि छुट्टै दल खोल्ने निर्णय
- बालेनले प्रत्यक्ष रूपमा चुनाव नखेले पनि समर्थन गर्ने तयारी
- जेनजी आन्दोलनको मर्म बोकेर वैकल्पिक राजनीति गर्ने लक्ष्य
दलको संयोजक सुदीप ढकाल हुने र चुनाव चिन्हका रूपमा ‘लौरो’ प्रस्ताव गरिएको छ। तर, हाल उक्त चिन्ह ‘हामी नेपाली पार्टी’सँग दर्ता भएकाले वैकल्पिक प्रतीकको पनि तयारी भइरहेको बताइएको छ ।
सचिवालयका अर्का सदस्यले भने, “प्रत्येक घण्टा परिदृश्य बदलिँदैछ, साँझसम्म ठोस निर्णय आउन सक्छ। तयारी तीव्र छ ।”
संयोजक बन्ने भनिएका ढकालले पनि राजनीतिक दल खोल्ने सम्भावना खुलेको स्वीकार गरे। “अहिलेसम्म औपचारिक निर्णय भएको छैन । तर, वैकल्पिक राजनीतिक अभियानमा संलग्न हुने सम्भावना खुला छ,” उनले भने । उनले थपे, “हामीले पारदर्शिता र जवाफदेहिता चाहेका थियौं, तर कुलमानको छलफलमा यी पक्ष कमजोर देखिएका थिए । त्यसैले हामीले छुट्टै बाटो रोज्यौं ।”
जेनजी (GenZ) आन्दोलनलाई संस्थागत रूप दिनका लागि यो दल खोल्ने तयारी भइरहेको बताइएको छ। ढकालले भने, “कसैले वैकल्पिक राजनीतिक दल नखोले वा जेनजीको माग सम्बोधन नगरे, हामीलाई अगाडि सर्नुपर्ने अवस्था आउन सक्छ ।”
स्रोतका अनुसार, बालेन शाहले दलमा प्रत्यक्ष सहभागिता नलिए पनि समर्थन गर्ने तयारी गरेका छन् । “उनी मेयरको कार्यकाल पूरा गर्ने अडानमा छन्। तर, जेनजी आन्दोलनको मर्मलाई निरन्तरता दिन उनले समर्थन गर्नेछन्,” बालेन सचिवालयका एक सदस्यले भने ।
यसअघि, बालेनले नियुक्त गरेका सहायक विज्ञ सन्तोष गिरीलाई कुलमानको टोलीमा पठाइएको थियो। उनले ‘राष्ट्रहित सर्वोपरि’ नामक कार्यक्रममार्फत वैकल्पिक राजनीतिक संवाद अगाडि बढाएका थिए। तर, सहमति नजुटेपछि उनी पनि फर्किएका हुन् ।
