जनकपुरधाम । श्रीराम–जानकी विवाह महामहोत्सव (विवाह पञ्चमी) सम्पन्न भएसँगै जनकपुरधामको सुन्दरता फोहरले ढाकिएको छ । महोत्सवका क्रममा आएका भक्तजनले जताततै फालेको फोहर नउठाइँदा सहर अहिले दुर्गन्धित बनेको हो ।
बुधबार सम्पन्न रामकलेवा (बिदाइ) कार्यक्रमपछि महोत्सव औपचारिक रूपमा समाप्त भए पनि जनकपुरधाम उपमहानगरपालिका र बृहत्तर जनकपुर क्षेत्र विकास परिषद् दुवै निकायको निष्क्रियताका कारण सहरभर फोहरको थुप्रो बढ्दै गएको स्थानीयको गुनासो छ ।
रंगभूमि मैदान (बाह्रबिघा), जानकी मन्दिर क्षेत्र, राममन्दिर प्राङ्गण, जनकचोक, रामानन्द चोक, रामचोक, सीताचोक, पुलचोक, रेल्वे स्टेशन, विद्यापति चोक लगायतका ठाउँमा पात, डिस्पोजेबल सामग्री, भोजन अवशेष र प्लास्टिकका फोहर यत्रतत्र फालिएका छन् ।
रेल्वे लिकसम्म फोहर भरिएको छ भने राममन्दिर छेउको नाला समेत जाम भएको छ ।
राममन्दिर परिसरमा सिन्दुर, टीका, लड्डु तथा फूलमाला बेचने व्यवसायीहरू दुर्गन्धका बीचमै बसेर व्यवसाय गर्न बाध्य छन् ।
व्यवसायी सुमित्रा देवीले भनिन्, “मैदानको फोहर त सहिन्छ, छेउको नालाको दुर्गन्धले बस्नै नसक्ने अवस्था छ ।”
फूल व्यवसायी बेचन मालीका अनुसार, अघिल्लो वर्ष महोत्सव सकिनासाथ सरसफाइ सुरु हुन्थ्यो, तर यस वर्ष कसैले ध्यान नदिँदा सहर फोहरमै डुबेको छ ।
वरिष्ठ पत्रकार श्यामसुन्दर शशीका अनुसार उपमहानगरपालिका र बृहत्तर परिषद् दुबैको निष्क्रियताले स्थिति बिग्रिएको हो ।
उनले भने, “मेयर मनोज साहले ठूला कुरा मात्रै गर्छन्, व्यवहारमा केही देखिँदैन। परिषद्का अध्यक्ष शितल साह आफ्नै कर्मचारीसँग विवादमै हुन्छन् ।”
उपमहानगरपालिकाका प्रवक्ता परमेश झाले जनकपुरधाम सफा गर्न उपमहानगर सक्रिय रहेको दाबी गरे ।
उनले भने, “क्रमिक रूपमा सरसफाइ भइरहेको छ। पूर्ण रूपमा सफा गर्न दुई–तीन दिन लाग्न सक्छ । ”
बृहत्तर जनकपुर क्षेत्र विकास परिषद्का अध्यक्ष शितल साहले पनि महोत्सवपछि फोहर थुप्रिएको स्वीकार गर्दै भोलिदेखि बृहत्तर सरसफाइ अभियान सुरू गर्ने बताए ।
राममन्दिर व्यवस्थापनमा खटिएको महावीर युवा कमिटीका महासचिव भरत साहका अनुसार, क्लब महोत्सव तयारीले थकित भए पनि सरसफाइबारे मेयरलाई निरन्तर सम्पर्क गर्ने प्रयास भइरहेको छ ।
उनले भने, “मेयरको फोन स्विच अफ छ। भोलिसम्म पनि तदारुकता नदेखिए हामी नै महासरसफाइ अभियान सुरु गर्छौँ । ”
जनकपुरधाममा छिटो सरसफाइ नहुँदा पर्यटन, व्यवसाय र दैनिक जीवन दुवै प्रभावित भइरहेका छन् ।
