जनकपुरधाम | जनता समाजवादी पार्टी (जसपा) नेपालका अध्यक्ष उपेन्द्र यादवले जनकपुरमा आयोजित तीनदिने प्रशिक्षण कार्यक्रममार्फत पार्टीका नेता तथा कार्यकर्तालाई प्रशिक्षण दिएका छन् । पार्टी स्कुल तथा प्रशिक्षण विभागको आयोजनामा शुभम् होटलमा बुधबारदेखि सुरू भएको प्रशिक्षण शुक्रबार सम्पन्न भएको हो ।
अध्यक्ष यादवले कार्यक्रममा नेपालको राजनीतिक शक्तिहरुको तुलनात्मक अध्ययन, जसपाको नीति–सिद्धान्त, नेतृत्व विकास, तथा देशको वर्तमान राजनीतिक अवस्था, दलहरूको वैचारिक दिशानिर्देशन, शक्ति सन्तुलन, संघीयता र गणतन्त्रका विषयमा विस्तृत प्रशिक्षण प्रदान गरेका हुन् ।
कार्यक्रममा राजनीतिक विश्लेषक जय निशान्तले डिजिटल युगमा एआई तथा सामाजिक सञ्जालको प्रभावकारी प्रयोग, नेतृत्व विकास, तथा निर्वाचन व्यवस्थापन सम्बन्धी प्रशिक्षण दिए ।
अर्थशास्त्री उमाशंकर प्रसाद साहले नेपालको अर्थतन्त्रको वर्तमान अवस्था, संघ र प्रदेशहरूबीचको वित्तीय हस्तान्तरणमा देखिने विभेदलगायत विषयमा सहभागीहरूलाई प्रशिक्षण दिएका थिए ।
समापन समारोहमा पार्टी अध्यक्ष यादवले सहभागीहरूलाई प्रमाणपत्र वितरण गरेका थिए । प्रशिक्षणमा पार्टीका प्रदेश समिति, जिल्ला समिति, राष्ट्रिय समिति, जनप्रतिनिधि तथा मनोनित सदस्यहरूको उपस्थिति रहेको जसपाले जनाएको छ ।
