नेपालको प्रमुख पदयात्रा गन्तव्यहरूमध्ये अग्रणी मानिने अन्नपूर्ण संरक्षण क्षेत्र (एसीएपी) ले चालू वर्षमा विदेशी पर्यटकको आगमनमा उल्लेखनीय वृद्धि दर्ज गरेको छ । जनवरीदेखि नोभेम्बरसम्मको ११ महिनाको अवधिमा कुल २ लाख ७३ हजार ६ सय ४६ विदेशी पर्यटक अन्नपूर्ण क्षेत्रमा प्रवेश गरेको एसीएपीले जनाएको छ । पछिल्ला वर्षहरूमा नेपालको पदयात्रा पर्यटन क्षेत्रमा देखिएको यो आगमन उल्लेखनीय मानिएको छ ।
एसीएपीका अनुसार अन्नपूर्ण क्षेत्रमा आएका पर्यटकमध्ये १ लाख १५ हजार ५ सय ५५ जना दक्षिण एसियाली देश (सार्क राष्ट्र) का रहेका छन् भने १ लाख ५८ हजार ९१ जना अन्य मुलुकका पर्यटक हुन् । विश्वकै आकर्षक पदमार्गका रूपमा चिनिँदै आएका अन्नपूर्ण सर्किट, अन्नपूर्ण बेसक्याम्प तथा वरपरका प्राकृतिक र सांस्कृतिक गन्तव्यहरूले पर्यटकलाई आकर्षित गर्न सफल भएको एसीएपीले जनाएको छ ।
एसीएपीको तथ्याङ्कअनुसार अप्रिल महिना यस वर्षकै सबैभन्दा व्यस्त रह्यो, जसमा ४४ हजार ७ सय ६३ पर्यटक अन्नपूर्ण क्षेत्रमा प्रवेश गरेका थिए । त्यसैगरी मार्चमा ३६ हजार ८ सय ३४, मेमा ३४ हजार ७ सय १६, जुनमा २६ हजार ८, जुलाईमा १४ हजार २ सय ३३, अगस्टमा १२ हजार १ सय ३२, सेप्टेम्बरमा १९ हजार ३ सय ८६, अक्टोबरमा ३७ हजार ७६ र नोभेम्बरमा २७ हजार ७१ विदेशी पर्यटक आगमन भएको एसीएपीले जनाएको छ ।
गत वर्ष २०२४ मा अन्नपूर्ण क्षेत्रमा कुल २ लाख ४४ हजार ४५ विदेशी पर्यटक आएका थिए । यस वर्ष भने ११ महिनामै त्यो सङ्ख्या २९ हजारभन्दा बढीले पार गर्दै नयाँ कीर्तिमान कायम भएको छ । कोरोना महामारीपछिका सुस्त वर्षहरूपछि २०२५ लाई पर्यटन पुनरुत्थानको वर्षका रूपमा लिन सकिने अन्नपूर्ण संरक्षण क्षेत्र आयोजना (एसीएपी) इलाका संरक्षण कार्यालय मनाङका प्रमुख ढकबहादुर भुजेलले बताउनुभयो ।
प्रमुख भुजेलका अनुसार पदमार्ग सुधार, सुरक्षा व्यवस्था, सरसफाइ, स्थानीय आतिथ्य, सामाजिक–सांस्कृतिक विविधता र हिमाली दृश्यावलोकनले अन्नपूर्ण क्षेत्रलाई विश्वस्तरको आकर्षक गन्तव्य बनाउँदै लगेको छ । साथै, सुगम यातायात, सहज सूचना सेवा र डिजिटल प्रचार–प्रसारले पनि पर्यटक आगमन बढाउन टेवा पुर्याएको उहाँको भनाइ छ । आउँदो वर्ष २०२६ मा पर्यटक आगमन अझै वृद्धि भई नेपालका हिमाली पर्यटन क्षेत्रले नयाँ उचाइ चुम्ने अपेक्षा गरिएको उहाँले बताउनुभयो ।
यसैबीच चक्रीय अन्नपूर्ण पदमार्गअन्तर्गत पर्ने मनाङ जिल्लामा मात्र नोभेम्बर महिनामा ६ हजार ७ सय ३ विदेशी पर्यटकको आगमन भएको छ । हिमाली सौन्दर्य, सांस्कृतिक विविधता र साहसिक पदयात्राका लागि ख्याति कमाएको मनाङले यो वर्ष पनि उल्लेखनीय सङ्ख्यामा पर्यटक भित्र्याउन सफल भएको छ ।
जिल्ला पर्यटन सूचना केन्द्रका अनुसार नोभेम्बरमा आएका पर्यटकमध्ये ३ हजार ९ सय १८ पुरुष, २ हजार ७ सय ८४ महिला र १ जना अन्य समूहका पर्यटक रहेका छन् । कुल आगन्तुकमध्ये ३ सय ९१ जना सार्क राष्ट्रका थिए भने ६ हजार ३ सय १२ जना अन्य मुलुकका पर्यटक हुन् ।
गत वर्ष २०२४ को नोभेम्बर महिनामा ६ हजार ९ सय २ पर्यटकले मनाङ भ्रमण गरेका थिए । त्यसको तुलनामा यस वर्ष करिब २ सय जनाले कम मनाङ भ्रमण गरेका छन् ।
